PODER. Ang mga opisya­les sa Barangay Ermita pinili sa katawhan sa miaging piliay. Gisuspenso sila sa Deputy Ombudsman for the Visayas tungod sa reklamo sa PDEA nga wa sila motabang sa gubat batok sa ilegal nga drugas sa ilang dapit.

Basi sa akong mahinumduman morag mao ni nag-una nga hitabo diin ang tanan mga opisyales sa usa ka barangay gisuspenso sa Ombudsman tungod sa reklamo sa usa ka ahensya sa gobyerno.

Ang mga suspendido mao sila si Ermita Brgy. Capt. Felicisimo “Imok” Rupinta ug konsehales Marky Rizaldy Miral, Antonieto Flores, Ryan Jay Rosas, Alio Tamundo, Domingo Ando, Maria Bianghug ug Wilbert Flores, mga kaalyado sa Team Rama.

Bisan tuod temporaryo ang ilang suspensyon apan sa tan-aw sa publiko mora na og sad-an sila. Unya sud sa unom ka buwan mahug nga walay opisyales ang Barangay Ermita.

Ang Department of Interior and Local Government (DILG), Region 7 di pa moimplementar sa suspensyon sa mga opisyales sa Barangay Ermita kay nangayo pa sila og clearance gikan sa DILG Central Office. Makapadayon pa sila sa ilang trabaho.

Matud pa ni DILG-7 Regional Director Rene Burdeos nga si Presidente Digong ra o si DILG Sec. Mike Sueno ang makatudlo sa ipuli aning mga opisyales nga gisuspenso sa Ombudsman.

Gani, miingon si Bise Ma­yor Edgar Labella, kanhi director sa Ombudsman, nga way katungod si Cebu City Mayor Tomas Osmeña nga motudlo sa ipuli sa opisyales sa Ermita tungod kay ang ilang suspensyon temporaryo.

Pung pa ni Bise Mayor Labella nga ang DILG ang mohulip sa lugar sa mga suspendido nga mga opisyales sa barangay. Mao ni nahitabo kaniadto sa Compostela diin ang ang DILG regional director maoy nilingkod sa opisina sa mayor dihang gisuspenso ang mayor.

Di ni pagdapig sa mga opisyales sa Ermita kay di man gani mi kaila. Ang atong Batakang Balaod naglatid nga bisan gani ang tawo nga nag-atubang na og kiha kriminal basta wa pa mahukmi sa atong hudikatora nga sad-an tan-awon gihapon na siya nga inosente.

Ang pagsuspenso sa mga opisyales sa Barangay Ermita atong makita ang kolor sa pamulitika tungod kay klaro man nga kaalayon sila sa Team Rama ni kaniadto Mayor Mike Rama. Wa ta moingon nga namulitika ang PDEA.

Hinuon, ang Ermita usa sa mga dapit dinhi sa dakbayan nga nailhan nga daghan ang mogamit ug namaligya sa ilegal nga drogas sama sa shabu. Mao nga dili kalikayan nga madudahan ang mga barangay opisyales nga protector sa nagpayuhot sa ilegal nga drogas.

****

TULOBAGON. Ang atong kagamhanan dunay tulobagon sa pagkidnap-patay ni Jee Ick Joo, usa ka Koreano nga negosyante. Ang labaw nga makauuwaw kay ang nangidnap mga pulis. Human mohatag ang iyang asawa og P5 milyunes nga ransom gipatay siya sulod sa Camp Crame.

Ginganlan karon ang pag­kidnap-patay ni Jee nga “tok­hang for ransom” tungod kay gigamit aning mga dautan nga pulis ang “tokhang”, ang tinuoray nga operasyon batok sa illegal nga drogas sa ilang pagpangwarta.

Bisan pa sa awhag sa mga pulitiko nga paundangon si PNP Chief Bato dela Rosa tungod sa maong palplak, si Presidente Digong dunay gihapon pagsalig.

Mas maayo nga mapsakaan dayon og kiha sa labing dali nga panahon ang mga pulis nga dunay kalabutan sa pagkidnap-patay ni Jee aron makita sa South Korea ug ubang nasud nga way gisanto ang panggamhanan ni Duterte.

Si Speaker Alvarez mora man og nagdrama lang sa iyang awhag nga paundangon si PNP Chief Bato dela Rosa. Atol sa birthday ni Bato miatender siya ug nagpapicture pa sa hepe uban ni Presidente Digong. Chief Bato paminawa ang tambag ni Sen. Ping Lacson.