MASALIGON si World Boxing Organization (WBO) welterweight no. 2 contender Jeff Horn nga aduna siya’y igong kusog nga makapatumba kang WBO welterweight champion Manny Pacquiao.
Kon madayon, ang duha ka mga boksidor magbinukbokay karong Abril 23 nga gituohang mapahigayon sa Suncorp Stadium sa Brisbane, Australia nga masudlan og 55,000 ka mga tawo.
“I know I have the power to hurt Manny,” matod ni Horn sa interbyu sa Fox Sports.
“He’s been knocked down and he’s been knocked out and I’m a heavy puncher so I believe I have a real chance to bring the world title to Australia.”
Si Horn adunay 16-0-1, 11KOs nga rekord samtang ang Pambansang Kamao sa Pilipinas naggunit og 59-6-2, 38KOs nga baraha.
Ang fighting senator sa Pilipinas nakatilaw og brutal nga knockout nga kapildihan batok kang Mexican Juan Manuel Marquez niadtong 2012 apan mibawi kini pinaagi sa pagposte’g impresibong kadaugan batok nila ni Brandon Rios, Timothy Bradley, Chris Algieri ug Jessie Vargas.
Si Horn gikan sa knockout nga kadaugan batok sa kanhi world champions nga sila si Ali Funeka ug Randall Bailey.