GISUGDAN na sa paghikay sa Cebu Province Sports Commisison (CPSC) ang mga lakang alang sa pagpahigayon sa Cebu Province Basketball Tournament nga salmotan sa mga dakbayan ug kalungsoran sa Sugbo.
Si Atty. Ramil Abing mipahibawo nga ila nang ipanghatod ang mga invitation letter ngadto sa tagsa ka local government unit karong semanaha uban sa mga lagda sa torneyo.
Gipasabot ni Abing nga mahimong makasalmot ang taga dakbayan sa Lapu-lapu, Mandaue ug Cebu City sa maong kompetisyon apan dili kini makaporma ug team sanglit ang mga nahisgutang siyudad naila na sa pagka-abunda sa talento.
Gusto ni Abing nga hatagan og kahigayonan nga mapakita ang talento sa mga kalungsoran ilabi na sa mga isla nga halayo sa siyudad.
Gikatakda nga magtagbao karong Enero 31 ang mga organizers, coaches, managers ug representantives sa matag lungsod nga mosalmot aron pagtuki sa dugang pang mga detalyi sa torneyo. Nagtuo si Abing nga moabot ngadto sa 50 porsiyento ang moapil sa kompetisyon nga salmotan sa 18 anyos ngadto sa 25 anyos nga mga magduduwa.
Tugotan nga makakuha ang team og labing daghan tulo ka kasamtangan o kanhi varsity players apan kinahanglan kini usa ka botante.