Talikala: Wa matarog sa mga pagsuway

ANG kapakyas sulod sa dag­hang mga higayon wala magpa­sabot og hingpit nga kapildehan.

Ang kapakyasan temporaryo ra diay nga babag.

Kon ikaw mopadayon bisan sa makadaghan ikaw nahagba, mo­abot ra ang panahon nga i­­­mong maangkon ang kalampusan.

Mao ni ang naamgohan ni Police Superintendent Wildemar “Deboy” Tiu, 39, kinsa maoy de­puty chief sa permit to carry firearms outside residence (PTCFOR) office sa Camp Crame.

Gawas nga siya graduwado sa Philippine National Police Academy (PNPA), usa siya ka lisensyado sa pagka civil engineer ug private/commercial pilot sa Civil Aviation Authority of the Philippines.

Apan sa wa niya kini ma­kab-ot, di tiaw nga kapakya­san ang iyang mga naagian.

Sunod-sunod nga pagkahagbong

Sa ilang pag-graduate sa Don Bosco Technological School (DBTC) niadtong 1994, na­nga­on sila ni Raymond Garcia, abo­gado na ug konsehal karon sa dakbayan sa Sugbo kinsa iyang classmate.

Iyang nahinumdoman ang gisulti Garcia nga maoy nakapadasig kaniya.

“Nangaon mi sa Cebu Country Club. Unya naestoryahan na­mo nga unsa kaha no mag PMA ka, mahimo kang general unya mahimo kong mayor?” pag­hi­­numdom ni Deboy sa ilang panag-estorya ni Raymond.

Sa wala pa siya ni-enroll sa BS Mechanical Enginee­ring, nikuha una siya og exam sa Philippine Military Academy sulod sa katulo ka higayon.

Apan, pakyas ang tulo niya ka mga higayon nga pagsuway. Gikan sa mechanical e­­­ngineering, nibalhin siya sa civil engineering.

Ni­suway usab siya sa pagkuha og eksam sa PNPA, gikan sa 1994 ngadto sa 1997, apan pulos gihapon kini pak­yas.

Atol sa iyang pag-eskwela sa college, nahimo usab siyang working student ug nitrabaho sa usa ka inilang fastfood chain.

Niadtong 1999, ni-take siya sa board examination sa civil engineering, apan iya sab nga gihimo nga praktisanan ang pasulit sa PNPA.

Atol sa birthday sa iyang mama nga si Carmelita niadtong Nobyembre 18, 1999 daw nahugno ang iyang kalibutan dihang siya ra ang nahagbong kay ang siyam niya ka mga kauban sa review ningpasar.

Iya unta nga isurprisa ang iyang inahan, apan siya ang nakugang sa resulta. Apan wa siya magpakawala sa paglaum.

Iya kining gihimo nga mga hagit sa kinabuhi.

Tukmang panahon

Nikuha usab di­­ay siya sa laing pa­sulit sa PNPA ug pag-abot sa Dis­­­yem­bre, good news a­lang kaniya kay nipasar siya.

Gitagoan pa sa iyang mama ang resulta sanglit dili gusto ang i­­­yang Mommy Carmelita nga mag-pulis si Tiu kay ang iyang papa nga si William, usa ka SPO4 ug iyang uncle class 1995 sa PNPA.

Ang sunod board exam sa civil engineering ipahigayon sa Mayo 4 ug 5, 2000 apan dunay pro­blema kay magsugod siya sa iyang kinabuhi sa PNPA sa Silang Cavite sa Mayo 8.

Wa siyay laing mahimo, nag-self review siya, nikuha sa pasulit ug nipasar sa wala pa siya nisugod og eskwela sa Academy.

Kon wala pa ang P1,000 sa iyang uyoan, posible nga di siya mahimong engineer kay niadtong panahona naapikihan ang iyang mama ug last day na sa filing didto sa PRC.

Ni-graduate si Tiu ubos sa Sambigkis Class 2003 ug nadestino sa Special Action Force (SAF) ug nipaubos sa commando training.

Nadestino siya sa F2 Intelligence unit ug didto nabanhaw ang iyang damgo nga mahimong piloto kay adunay air asset ang SAF diin siya gidestino.

Niadtong 2004 hangtod 2006, nipaubos siya sa training aron mahi­mong Piloto diin iyang gipahimuslan ang higayon sanglit kon moeskwela siya nga iyaha ra, mogasto og minilyon ang maong kurso nga di makaya sa iyang ginikanan.

Tuod man nipasar siya sa pasulit ug nakakuha og lisensiya isip private ug commercial pilot.

Niadtong 2009, nikuha siya og eksam para mahimong police peacekeeping force sa United Nations ug gipadala siya sa Sudan nga nilanat og kapin 1 ka tuig.

Sa iyang pagbalik sa Pilipinas, gidestino na siya sa Police Regional Office ( PRO7) sang­lit di na sila makabalik sa SAF nga maoy iyang mother unit.

Iya kining gikalipay sanglit makaserbisyo na siya sa iyang yuta nga natawhan.

Nagtrabaho siya isip staff sa Regional Director ug na­balhin sa Cebu City Police Office ug nahimong chief of operation sa wala pa siya gihimong hepe sa police station sa panahon ni Chief Supt. Melvin Buenafe.

Niadtong 2014, si kanhi mayor Michael Rama nangita og hepe sa Fuente police aron mapahapsay ug mawala ang mga badlungon, night dwellers, snatching. Tuod man, gi­re­komendar si Tiu ug iyang natuman ang trabaho.

Dinhi gipasanginlan siya ug iyang mga sakop nga maoy nikulata sa batang babaye nga adunay mga bun-og ug namatay.

Apan sa kauwahian, nilutaw sa imbestigasyon nga gi­bun-og diay sa ama-ama nga adik ang bata nga gigamit sa pagpakilimos. Ni-resign siya isip hepe ug nabalik sa PRO-7 dayon sa CCPO ug nahimong hepe sa PS4 (Mabolo) ug niadtong Hunyo 2016 gikuha siya ni Director General Ronald “Bato” dela Rosa ug gihimong administrative officer. Niining bag-o, siya maoy Top 1 sa Police Executive Service Eligibility (PESE) diin 259 ang nipasar gikan sa 289 ka police commissioned officer nga gidumala sa National Police Commission.

Gradwado usab siya sa Master in Public Administration niadotng 2014 sa SWU isip Meritissimus o Cum Laude ug padayon nga nagkuha sa iyang Doctorate Degree sa UV.

Duna gyud diay tukmang panahon alang sa tanan. Bisan sa mga kapakyasan, gihuwat ni Tiu ang tukmang panahon uban sa way paglubad nga paglaum.