NGANONG wa pasirad-i ni Mayor Tomas Osmeña ang mga restaurant bar (restobar) nga nakalapas sa iyang direktiba atol sa Fiesta Señor ug Sinulog Festival?
Matod ni Osmeña adunay mga komentaryo batok kaniya nganong niatras siya sa iyang nahiunang pamahayag.
Apan giklaro sa mayor nga wa siya niatras apan iyang giklaro nga magdepende ang silot sa kalapasan nga ilang nahimo ug iyang giklaro nga di usab niya kuhaan sa panginabuhian ang mga establisemento.
Gihulagway sa mayor nga di siya ganahan mogukod sa mga tawo kay iya kining gihulagway nga gagmay nga magpapatigayon ug gusto niya nga patilawon og tagam ang dagko nga mga negusyante.
“I don’t like to bully small people. I would like to bully Ayala, SM, Filinvest. I have no mercy for those people,” prangka ni Osmeña.
Siya nipasaka na og mga kaso sa maong mga kompaniya gumikan sa isyu sa buhis ug apil ang ilang mga banko nga gipanag-iya gipaubos sa makuti nga pakisusi sanglit namatikdan sa mayor nga usa sa branch sa BDO giingong wa magtug-an sa ilang tinuod nga gross income.
Gibutyag sa mayor nga di niya sirad-an ang maong mga establisemento apan gikinahanglan nga di na nila buhaton ang samang kalapasan.
Sa niaging Sinulog, ang mga restobar sagad nahimutang sa midtown area (Fuente ug Mango Square, Juana Osmeña) nagpainom gawas sa ilang establisemento, gigamit ang parking isip imnanan, nagpagawas sa ilang sound system nga maoy nakapa-wild sa mga tawo nga mosayaw nga nakahatag og peligro sa mga tawo nga moagi sanglit naabot na sila sa karsada nga nakalapas sa hangyo ni Osmeña.