MAAYONG balita ngadto sa mga empleyado sa Ce­bu City Government nga nagtukaw samtang ang uban maayong pagpa­hu­­way ug pagkahinanok.

Hatagan og insentibo ni Mayor Tomas Osmeña ang mga sakop sa City Traffic Operation Management (Citom) ug Department of Public Services (DPS) gumikan sa ilang natampo sa kalampusan sa dagko nga kalihukan sa dakbayan.

Una gipadayag ni Osmeña nga kon wa pa ang mga traffic enforcer nga nagtrabaho sa mga holiday niadtong Disyembre ug kasaulogan sa Sinulog nga iyang gihulagway nga dako og tampo taliwa sa kahuot sa trapiko.

Iyang gibutyag nga sagad sa mga sakop sa Citom mga tawo ni kanhi Mayor Michael Rama apan wa siya maghuna-huna niini sanglit nikayod og trabaho ang mga empleyado.

Gidayeg usab sa mayor ang natampo sa mga personnel sa DPS diin ilang nalimpyo ug nahakot ang 140 toneladang basura sa Sinulog route ug ubang parte sa siyudad.

Apan giklaro sa ma­yor nga di tanan nga sakop sa departamento ang hatagan og insentibo ilabi na kadtong wa nagtrabaho.

“If you do your job we will pay you. I’m working for the bonuses we will find ways and means maybe one sack of rice or we will give cash as long as you earned it we will pay you,” pahibawo ni Osmeña.

Gipahimug-atan usab sa mayor ang kontribusyon sa dul-an 20 ka mga traffic enforcer gikan sa Task Force Alpha nga way sweldo gikan sa siyudad sa pagpatuman sa kahapsay sa trapiko.

Kon di bugas ang ihatag sa City Government posible nga cash ang itunol ni Osmeña ngadto sa mga tawo nga takos mo­dawat sa insentibo.

Gipadayag sa mayor nga P2,000 ngadto sa P5,000 ang iyang nahunahunaan apan kinahanglan pa usab kini niyang iduso ngadto sa City Council a­­­lang sa pagtugot.