UPAT ka mga kaso nga namatay tungod sa rabies ang natala sa Provincial Health Office (PHO) sa miaging tuig, gikan sa 20 mil ang natala nga animal bite cases.

Hinuon, ang mga provincial ug district hospital duna nay mga Animal Bite Treatment Center aron maoy moatiman niadtong mga posibleng mapaakan ug iro o iring, sama sa nahitabo sa dakbayan sa Mandaue.

Gitug-an sa rabies coordinator sa PHO, Mabel Amarga, matag tuig dunay pagsaka sa ihap sa mga mataptan sa rabies tungod usab sa padayong pagsaka sa populasyon. Niadtong 2016, kapin sa 20 mil ka animal bite cases ang natala sa tibuok probinsiya sa Sugbo samtang 4 niini ang namatay tungod sa rabies infection.

Ang rabies death cases natala sa lungsod sa San Remegio, Sta. Fe, Barili ug Talisay City.

Kon mapaakan ug iro o iring, gipadayag ni Amarga nga kina­hanglang modangop dayon sa labing duol nga Animal Bite Treatment Center apan isip first aide, angayang limpyohan ang samad-pinaakan gamit ang tubig ug sabon ug dili ang naandan nga pagbutang niini og ahos.

Niadtong Domingo, moabot sa 21 ka mga indibidwal ang gipaak ug iro sa dakbayan sa dakbayan sa Mandaue. Namatay ang iro human kini posibleng na-suffocate sa sako, diin siya gisulod human usab siya na-contain sa mga tawo.

Sigun ni Amarga, kinahanglan pa gyud unta nga ipaubos sa 10-14 ka adlaw nga obserbasyon ang iro o iring nga nakapaak ug dili unta kini patyon aron ma-monitor usab ang kahimtang sa panlawas sa pasyente nga napaakan niini.

Kon mamatay ang iro, ang labing maayong buhaton mao ang pagkumpleto gyud sa 4 ka shot sa anti-rabies vaccine injection.

Sa 16 ka mga district ug provincial hospitals sa Sugbo, bugtong ang Pinamungajan District Hospital lang ang wa’y Animal Bite Treatment Center apan duna kini Rural Health Unit, nga mahimong maka-refer sa pasyente ngadto sa laing sentro.

Diha usab mismo sa Kapitolyo, dunay treatment center nga makaatiman niadtong mga tawo nga posibleng mapaakan ug iro o iring. Libre kining mapahimuslan, depende sa dose.