KAPIN sa tunga sa milyon ka pesos nga kadaot ang inisyal nga natala sa Provincial Agriculture Office (PAO) human ang way hunong nga pag-ulan sa miaging semana.
Giawhag ang mga uban pang local government units (LGUs) nga naapektohan sa pagbaha pagduso ug assessment, ilabi na sa aspeto sa agrikultura aron mapangitaan ug paagi kon unsaon kini pagtubag.
Sa talaan sa Provincial Agriculture Office, ang mga lungsod pa lang sa Balamban ug Pinamungajan ingun man ang siyudad sa Toledo ang nakaduso ug damage report sa agrikultura human ang nahitabo nga mga pag-ulan ug pagbaha sa miaging semana.
Sigun ni Provincial agriculturist, Roldan Saragena, 198 ka ektarya nga humayan, nga iya sa 210 ka mga mag-uuma ang nangadaot dihang gi-ulan ug gibaha ang sa maong tulo ka mga dapit sa miaging semana.
Gibanabanang P530 mil ang kadaot sa mga pananum nga humay, nga anaa na usab sa iyang vegetative stage.
Gawas sa humay, nitaho ang Toledo City ug kadaot sa mga pananum nga utanon. Matod ni Saragena, dunay 1.35 ka ektaryang luna nga gitamnan ug utanon nga iya sab sa 11 ka mga mag-uuma ang naapektohan. Anaa sa P39,375.00 ang kantidad sa kadaot.
Gisusi na karon kon na-enroll sa fisheries and crop insurance sa probinsiya ang nangadaot nga pananum alang sa posibleng claims sa mga apektadong mag-uuma.
Giawhag sab ang uban pang mga LGU pagduso usab sa ilang damage assessment alang sa posibleng mga ayuda gikan sa Kapitolyo.
Giangkon ni Saragena nga lisud pangandaman sa mga mag-uuma ang way hunong mga pag-ulan mugna sa low pressure area, sama sa nahitabo sa miaging semana. Nunot niini, gipadayag niya nga labing maayong buhaton mao ang pagpaseguro sa ilang mga pananum ug hayupan.
Mas maayo sab ang regular nga pag-monitor sa kahimtang sa panahon aron makapangandam ug maluwas ang kaugalingon gikan sa posibleng mga kadaot.
Sa laing bahin, dunay natala nga ground rupture o pagulpa sa yuta sa Barangay Uling, siyudad sa Naga, atol sa mga pag-ulan sa miaging semana.
Matod sa Research and Development officer sa PDRRMO, Rhee Telen, Jr., 39 ka mga pamilya ang pugos nga gipabakwit o gipabiya sa dapit, diin nahulpa ang yuta.
Hinuon, 37 lang niini ang anaa sa evacuation center samtang ang laing 2 ka mga pamilya, nipuyo kauban sa ilang mga paryente.
Sigun ni Telen, gipaabot pa nga mahuman ang assessment sa Mines and Geosciences Bureau (MGB) sa dili pa hingpit nga tugotan ang mga residente pagbalik sa maong dapit.
Sa laing bahin, nakig-alayon na usab ang PDRRMO sa Department of Public Works and Highways human nga dunay barangay road sa Lupa, Composetal ang dili maagian og 4-wheel vehicle human kini nakaangkon ug dakong liki, mugna sa ulan ug baha. Kon ipugos ang pag-agi sa dapit, hayan nga posibleng matagak ang ligid sa sakyanan o mabulasot ang tiil sa tawo.