GIKATAHO nga pulos nakainom og ilimnong makahubog ang nagpahaguros og padagan sa ilang gimanehong motorsiko ug ang duha nakabangga sa dalan sa Barangay Cogon, Lungsod sa Tuburan alas 6:10 sa gabii sa Disyembre 13, 2020.
Ang duha ka drayber patay.
Si Jonathan Banga-Banga, 29, dunay kapuyo ug taga Barangay Mag-atubang, Tuburan, dead-on-arrival (DOA) sa tambalanan sa lungsod. Lakip nga DOA ang gikabangga niya nga si Ralph Peñolosa, 40, minyo ug taga Barangay 7 sa samang lungsod.
Si Police Staff Sgt. Romar Andrino, nga nahinabi sa Superbalita Cebu nagkanayon nga si Banga-Banga, nagsakay sa iyang 150cc Motostarug ug kusog nga nakapadagan padulong mopauli.
Ug pag-abot niya sa naasoy nga dapit, gikasugat niya si Peñalosa nga naghaguros sab sa pagpadagan sa iyang 150cc Honda.
Tungod sa kakusog sa dagan sa duha magkabanga, nangalagpot sa karsada. Gumikan sa kakusog sa impact grabing kadaot sa ilang kalawasan nga naangkon.
Matod ni PSsgt. Andrino, nasuta sa imbestigasyon nga ang duha pulos nakainom, gikan nagtagay sa ilang tagsatagsa ka higala. (GPL)