DRUG cleared na ang duha ka mga barangay ning dakbayan sa Cagayan de Oro sumala sa gihimo nga monitoring sa kapolisan.
Kini ang gikumpirma ni Macabalan Police Station 5 Chief Ernesto Daing ug ang mga barangay mao ang 21 ug 23 ning dakbayan sa Cagayan de Oro.
Matud ni Daing sa SunStar SuperBalita nga gihimo nila ang kaugalingon nga monitoring ug mao sab ilang nakumpirma nga wala nay tigpayuhot og ginadili nga droga sa maong mga barangay.
Kini resulta sa ilang sunod-sunod nga Project Double Barrel diin gilangkoban sa Oplan Toktok Hangyo ug Tapok Hangyo.
Gawas niini girekomendar sa Barangay Anti-Drug Abuse Council nga drug free na ang ilang tagsa-tagsa ka barangay ug sa ilang pakisusi sa kapolisan ug nakumpirmang wala na ang presensya sa ginadili nga droga hinungdan nga gideklarar kining drug cleared ning panahona.
Daw dili lang usab ang kapolisan ug barangay mi-cleared niini apan lakip ang Philippine Drug Enforcement Agency.
Ang Barangay 21 gipangulohan ni Kapitan Hilda Go ug Kapitan Jaime Frias ang Barangay 23.
Una na nga gibutyag ni Frias sa SunStar SuperBalita nga drug free ilang barangay kay wala na gayud presensya niini human napuhag sa dakong operasyon nga gihimo diin kapin usa ka milyon ang kantidad sa shabu nga nakumpiska gikan sa drug dealer ug mga drug user.
Hinuon gibutyag ni Daing nga taliwala deklaradong drug cleared ang naasoyng barangay padayon gihapon ilang monitoring ning panahona.
Hinuon ubos pa sa obserbasyon ang laing barangay nga sakop sa ilang area of responsibilty mao ang Macabalan, Puntod, Consolacion ug Barangay 25.
“Dako-dako pa ni nga clearing operation ug kini maoy atong gihimo karon nga mapadayon ang operation double barrel niining maong mga barangay,” butyag niini.