MOKABAT ngadto sa 67 gramo sa shabu ang nakumpiska gikan sa suspetsado atol sa gipahigayong drug bust sa kapolisan niadtong Biyernes, Enero 20, milabay nga adlaw diha sa Tipolohon, Barangay Camaman-an, dakbayan sa Cagayan de Oro.
Malampusong nasikop ang suspek nga nailang si Arnel Ybañez, 49, minyo nga residente sa nahisgutang dapit.
Sa nahipos nga impormasyon gikan sa Police Station 2 sa Cogon, gikabutyag nga nasikop ang suspek human kini napalitan sa ginadili nga droga ug nakuhaan og mga drug paraphernalia atol sa drug bust sa pagpangulo nila ni Police Station 2 Chief Gilbert Rollen ug Deputy Station Commander Jhonny Agutaya.
Giingong atol usab sa maong operasyon naatlan ang laing tulo ka mga lalaki nga nailang sila si Michael Abas, 36, ulitawo nga taga Kili-og, Bukidnon kinsa nakuhaan og duha ka pakete sa gitoohang shabu, Randy Ministerio, 30, minyo nga taga Kinawi, Bukidnon nga nakuhaan og laing duha usab ka pakete sa gitoohang shabu, ug Junie Mandayanon, 28, adunay kaipon nga taga Buntong, Camaman-an kinsa nakuhaan og usa pa pakete sa uga nga dahon sa marijuana.
Giingong ang tanang ebidensya nga nahipos gibanabanang mokabat sa kantidad nga P335 mil diin adunay gimbug-aton nga 67 gramo.
Samtang sa laing operasyon nasikop usab ang suspek nga si Jefferson Galarpe, alyas Epok, 22, ulitawo nga taga Adila, Barangay Camaman-an, human nakig-transaksiyon sa confidential informant sa kapolisan gamit ang cellphone apan sa dihang namatikdan ang presensya sa kapolisan dali kini nga misibat ug swerteng nasikop kini gihapon sa mga otoridad.
Nakuhaan sa mokabat sa 10 gramo nga shabu nga gibana-banang nagkantidad og P50 mil ang suspek diha gisuksok sa may butones nga bahin sa iyang gisul-ob.
Sa pagkakaron, ang maong mga suspek ang kasamtangang nagtingkagol na sa prisohan aron sa pagpaabot sa tukmang kaso batok kanila.