MISUGOD na si Donald Trump isip pamuno sa Tinipong Bansa o Estados Unidos sa Amerika. Daghan ang nagalaom nga mohumok na si Pamuno Duterte ngadto sa maong nasod.

Di na man si Barack Ubama kanhi iyang gibalikas tungod sa violation kuno ni Digong sa mga tawhanong katungod sa iyang kalabutan sa pagpamatay sa drug personalities.

Si Digong kuno ug si Donald Trump susama’g ki­na­iya ug panlantaw busa magkasinabot. Gani dihang si Digong nipahalipay kang Trump madasigon ang ilang panag-estorya. Sa sinultihan daling malitok ang foul language kon masuko sila.

Apan kining susama di gyud pareho. Si Donald Amerkano ug lahi ang kuttura. Isip lider sa labing gamhanang nasod sa kalibutan siya nagdinawo kay ‘American first’ ang Amerika.

Husto man sad sa laing bahin. Lisod na pagsud sa mga langyaw sa Estados Unidos. Pinikito na ang pagdawat sa mga export products labi na gikan sa China. Busa sa mga Filipino ang ilang ‘American Dream’ lisod na pagtuman.

Namulong si Digong nga siya andam magpakamatay tungod sa iyang gugma sa nasod. Si Trump misaad lang nga himuon niyang dato o sapian ang matag Amerikano sa iyang administrasyon.

Ang akong pagsabot nga iyang pakunhoran tingali ang buhis ug itanyag ang sayon nga kahigayunan sa entrepreneurship. Usa ka bilyunaryong negusiyante si Trump nasayod kaayo unsay himuon.

Ang preference ni Digong mao ang pagluka sa drugas nga matod pa sa PDEA 4 milyunes na ka mga Filipino ang nagumon niini. Apan ako nagtuo nga subra pa kaayo niana ang mga adik..

Kay matod pa, ang shabu nakasud na sa kada barangay sa nasod diin 30-40% ang mga adik. Tiamo na ingnon lang nga 4 milyunes ang nagbisyo. Pakita ra ni aron ingnon nga sila nagtrabaho.

Si Trump ubos ra kaayo ang trust rating (40%). Kang Digong subra kaayo kay 84% ang misalig.Nagpasabot nga sila uyon niining pagpamatay sa mga drug personalities nga nagbatak sa katilingban.

Sayri Kini. Ang Bathalad awarding rites sa Enero 28 magsugod 2pm. Himuon ang eleksiyon una, dayon ang awarding rites pagkahuman ang Basabalak halad nilang Pantaleon Auman, Alfredo Cabinatan ug Lorenzo Canoy kanhi mga pamuno (psk’s).

Gihangyo ang asawa o anak o kaliwat nilang Auman. Cabinatan ug Canoy sa pagtambong. Tungod sa kahagip-ot maglisod mi sa pagkontak. Among Cel. 09121079045, 09205820395. Manambong sila Dr. Mel (Tagtukod)ug Mrs Thelma Allego ug Ambassador Butch Bandillo.