Mga duwa karon
4:15 pm- Star batok Blackwater
7:00 pm- GlobalPort batok Talk N’ Text
PAREHA og tahas ang upat ka teams nga mopakita’g aksyon sugod karong hapon sa Philippine Basketball Association (PBA) Philippine Cup sa Cuneta Astrodome – paamagon ang ilang poruhan sa inilugay sa nahabiling twice-to-beat nga bintaha sa quarter-finals.
Sa premirong duwa, magsangka ang Star Hotshots batok Blackwater Elite samtang magkombati sa main game ang GlobalPort Batang Pier batok sa Talk N’ Text KaTropa.
Ang defending champion San Miguel Beermen maoy nakaangkon sa no.1 spot ug labing unang twice-to-beat nga bintaha sa nagkaduol nga quarter-finals human nila gilupig ang Batang Pier niadtong Sabado sa out-of-town game sa Hoops Dome sa Lapulapu City.
Gumikan niini, ninghuot ang inilugay sa ikaduha ug katapusang twice-to-beat nga bintaha.
Ang Batang Pier ug KaTropa kasamtangang natanggong sa four-way nga panagtabla sa 5-4 nga rekord diin ilang gikauban sa ikatulong luna ang Alaska Aces ug Rain or Shine Elasto Painters.
Ang Batang Pier nagkinahanglang modaog sa nahabilin nilang duha ka mga duwa sa elimination round – lakip na kining engkuwentruha – ug mag-ampo nga mapilde ang kasamtangang naglingkod sa ikaduhang luna nga Phoenix Fuel Masters (6-4) aron makuha ang nahabiling twice-to-beat nga bintaha.
Kon kuliton og maayo, ‘gubot pa sa lukot’ ang sitwasyon gumikan kay hasta ang Hotshots ug Elite aduna gihapo’y poruhan nga makakuha og twice-to-beat nga bintaha bisan nahimutang kini sa mas ubos nga bahin.
Ang Elite adunay 5-5 nga rekord samtang ang Hotshots naggunit og 4-4 nga rekord.
Ang Elite, nga mokombati sa katapusan nilang duwa sa elimination round, nagkinahanglang modaog ning sangkaa ug mag-ampo nga mopabor kanila ang resulta sa nangahabiling mga duwa.
Sa ilang bahin, ang Hotshots nagkinahanglang moharos pagdaog sa nahabilin nilang tulo ka mga duwa aron magpabiling buhi ang ilang poruhan sa twice-to-beat nga bintaha.
Apil ang ubang teams, walo pa ang ang posibleng makakuha og twice-to-beat nga bintaha, depende sa resulta sa nahabiling mga duwa.