Way barangay nga drug-free sa Sugbo

WALAY bisan usa nga barangay sa lalawigan sa Sugbo nga matumbok sa pagkakaron nga drug-free o luwas na sa pag-abuso sa gidiling druga.

Katunga na sa 202 ka mga barangay sa probinsiya nga girekomendar sa kapulisan nga himuong drug-cleared apan, pag-validate sa Cebu Provincial Anti-Drug Abuse Office (CPADAO) wala kini makapasar isip walay kalihokan sa drugas.

Sa 202 ka mga barangay nga girekomendar sa Cebu Provincial Police Office (CPPO), mokabat na sa 103 niini ang na-validate na sa CPADAO pinaagi sa siyam ka teams ningsusi kon wala na bay presensiya sa drug pushers ug users sa mga dapit gitumbok sa CPPO.

Apan, matod ni CPADAO executive director Ivy Meca, wa pa’y bisan usa sa maong mga barangay ang mahimong ideklarar nga drug-cleared subay sa regulations sa Dangerous Drugs Board (DDB).

Matod ni Meca nga duna silay natala nga mga barangay nga wala na’y namaligya og drugas apan nag-yaka lang ug wa’y gihimo ang Barangay Anti-Drug Abuse Council (Badac) aron masustiner ang maong kahimtang.

Gawas niini, dunay mga barangay nga way house clusters o purok nga motabang sa anti-drug campaign, way voluntary rehabilitation desk, way action plan alang sa barangay drug-clearing.

Nakita usab sa CPADAO ang problema sa pag-proseso sa kabarangayan sa aplikasyon alang sa volun­tary and compulsory rehabilitation sa ilang mga drug surrenderer ug nagkinahanglan kinig giya aron magmalampuson ang ilang kinatibuk-ang kampaniya batok sa gidiling drugas.

Sigun ni Meca, aron mahingpit ang paghimo sa mga barangay nga cleared gikan sa illegal nga drugas, kinahanglan ipatuman nila ang drug supply ug demand reduction, paghimo ug alternatibong mga paagi alang sa kalambuan sa mga surrenderer, civic awareness aron malikay sa bisyo ang mga residente ug pagpakig-alayon sa lokal ug nasudnon nga anti-drug commissions.

Nalipay hinuon si Meca nga aktibo ug positibo ang pagdawat sa mga barangay official sa giya gikan sa CPADAO, bisan paman ug dili pa hingpit madeklarar nga drug-cleared ang ilang dapit.

Matod niya, dili na kinahanglang moabot sa kinihiay sa mga opisyal sa barangay, sama sa nahitabo sa Barangay Ermita sa dakbayan sa Sugbo, sanglit nihimo man og lakang ang kabarangayan aron masumpo ang suliran sa ilegal nga drugas.

Kon mahimong drug-cleared ang kabarangayan dinhi sa Sugbo, hayan nga mosunod na unya ang posibleng pag-deklarar nga drug-free sa tibuok probinsiya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph