DI mominos 35 ka mga sakyanan sa kadagatan, 15 niini mga motor banca, ang wa tugoti mobiyahe kagahapon gumikan sa gale warning nga giisyu sa Philippine Atmospheric, Geophysical and Astronomical Services Administration.

Si Commander Dionlett Ampil sa Cebu Coast Guard Station niingon ang mao nga mga sakyanan kay 250 gross tons ug paubos ang gibug-aton.

Matod niya delikado ang paglawig sa mga gagmay nga sakyanan sa kadagatan kon dagko ang mga bawod sa kalawran.

Ang ilang mga biyahe gikan sa Sugbo paingon sa Consuelo, San Francisco, Camotes; Olango Island, Lapu-Lapu; Bantayan Island Maasin ug Ormoc, Leyte; San Carlos, Negros Occidental; Sibulan, Negros Oriental; Tagbilaran, Tubigon ug Getafe, Bohol.

Si Alice Canasa, weather specialist sa Pagasa Mactan, niingon nga dagko ug kusog ang mga bawod sa kalawran sa Kabisay-an gumikan sa hanging amihan.

Siya nipasidaan nga moabot ngadto sa 3.4 metros ngadto sa 4.5 metros ang gitas-on sa bawod sa lawod ug delikado sa gagmay nga sakyanan sa kadagatan.

Matod ni Canasa nga molungtad sa duha ngadto sa tulo ka adlaw ang gale warning nga giisyu.

Si Ampil nidugang nga mag-agad sa mga kapitan sa mga barko nga sobra sa 250 gross tons ang gibug-aton kon mopadayon sa ilang biyahe tungod sa dagkong mga bawod.

“Calm pa ‘yong waves sa Cebu pero paglabas nila malalakas na, dapat mag-ingat,” dugang niya.