PATAY ang usa ka 12-anyos nga lalaki kinsa nagtungha sa elementarya human natabunan og yuta atol sa nahitabong landslide sa Barangay Datu Daligasao, Sta. Maria, Davao Occidental alas 12:00 sa tungang kagabhion, Lunes.
Sumala ni Barangay Secretary Jigs Paglinawan, 42, minyo ug molupyo sa lugar, way puas ang pag-uwan sa lugar sukad Dominggo sa buntag hinungdan nga mihumok ang yuta.
Midahili ang yuta sa Sitio Inalaran nga nakahimo og grabeng danyos ug mikalas sa kinabuhi sa batang si Demer Salio, nagtungha sa Datu Daligasao Elementary School.
Sumala sa imbestigasyon ni Police Officer 3 Aida Luceñara Awitin, misamot kakusog ang uwan sa lugar pagka-gabii.
Sa insidente, naguba ang balay ni Jimmy Salio hinungdan nga daling mibakwit ang pamilya sa taas nga bahin sa lugar.
Apan nalimtan og pukaw sa pamilya ang anak nga natulog niadtong higayona sud sa ilang balay.
Wa magdahom ang pamilya nga matabunan sa yuta ang biktima nga miresulta sa pagkamatay niini.
Samtang padayong alerto ang kapulisan sa lugar tungod sa padayong pagdaut sa panahon mao nga gi-abisohan na nila ang katawhan nga mag-amping aron malikayan ang dugang kadaut sa kalamidad. (OBD)