SUSPENDISO pa gihapon ang klase sa Camaman-an Elementary School usa ka semana human gibaha ang tunghaan.
Ang low pressure nga nasinati niadtong Enero 16 nga naghatod og halapad nga pagbaha sa dakbayan sa Cagayan de Oro ang nagbilin og labihan ka baga nga lapok sulod sa naasoy'ng tunghaan rason nga hangtod ning panahona, padayon sa pagpanglimpyo ang mga magtutudlo.
Si Camaman-an Kapitan Pete Arda nibutyag nga dili usab nila masaligan ang mga ginikanan sa mga tinun-an tungod kay lakip ang ilang mga balay ang gibaha ug lapok gihapon karon panahona.
Gikalipay na lamang nila nga adunay mga volunteer sama sa kapolisan ug kasundalohan ug nagamay gamayan ang pita nga hatod sa baha sulod sa tunghaan.
Hinuon ang kadagkoan sa tunghaan nipasalig nga mopahibalo lamang kung kanus-a mobalik ang normal nga klase labina usa na sila ka semana nga delatar. (SVB)