KON sa una si coach Yeng Guiao ang bokal kaayong mipadungog nga ang sobra (take note: sobra) nga kaistrikto sa sistema ni komisyoner Chito Narvasa maoy nakatampo sa kamingaw sa mga duwa sa Philippine Basketball Association (PBA).
Karon ang kanhi inila usab nga coach sa liga nga si Tommy Manotoc ang mipadayag sa negatibong obserbasyon. Ang champion coach nga may unom ka mga titulo sa PBA lakip na niini ang grandslam title sa Crispa Redmanizers, mipasabot nga daghan na karon nga fans ang nawad-an og interest sa PBA kay ang mga player magpanagana na og lihok tungod sa ka estrikto niini ug makapabati sa ilang dinuwaan.
Ang pagsigi usab og hunong sa duwa makapaminus sa aksyon ug makapaduka sa mga manan-aw.
“You are trying to the players with their version of discipline,” matod ni Manotoc sa interview sa Spin.ph.
“Nawawala ang individuality nung player, their personalities, which is what the PBA needs, I think. They need more personalities, they don’t want robotic players.”
Tungod sa ka estrikto ni Narvasa nga dali ra kaayong makapamulta, sa tulo pa gani ka buwan sa nagpadayon nga conference moabot na gud og sobra sa tunga sa milyon ka pesos ang nakolekta sa penalty gikan sa mga players ug mga coaches.
Di man ta supak ning pagdisiplina pero sa gikaingon ko na sobra na nga halos di na molutaw ang natural nga dinuwaan sa mga player kay magpanagana ug mahadlok nga makamulta.
Niini, nanawagan si Manotoc nga unta mohimog pakisusi ang PBA Board kalabot niini ug kinahanglang susihon og maayo ang sistema ni Narvasa kon haom ba kini sa katuyo-an sa liga.
Namahayag si Manotoc nga tingalig uwahi na ang tanan ug mao lang unyay mamat-an sa board nga ang duwa na lang sa Ginebra ug San Miguel maoy dunay igong crowd.
Mura og nahitabo na man seguro ni ron. Dinhi sa atoa way kalahian ni sa Cebu Schools Athletic Foundation, Inc. (Cesafi) basketball tournament nga labaw pud nga gilangaw.
Angay sab gyud unta suta-on sa Cesafi board kon nganong daghan ang wa na ganahi manan-aw sa mga duwa aron kahimuan og aksyon. Pero mura man og nagpakahilom ra.
*******
Belated happy birthday diay sa atong higala nga si kanhi PBA player Rey Yncierto kinsa nagsaulog sa iyang adlawng natawhan niadtong Lunes. Lakip nga mitambong sa selebrasyon sila si nila ni Montoy Singson, Michael Dumdum, Aldrin Barola ug ingon man si Jeff Macoy nga lab-as pa kaayo gikan sa US.
Pero diha sab ang iyang regular guest nga si kanhi world boxing champion Gerry Penalosa nga nakighuyhoy nila ni Quiot barangay captain Francis Espares ug sa mga konsehalis niini. Cheers to Reyns kinsa gikatakdang mobalik na sab sa Estados Unidos sunod buwan.
(junmigs0622@yahoo.com)