Manny wa’y planong mobiya sa Mahindra

TAODTAOD na sab nga wala nagpakita sa Philippine Basketball Association (PBA) si fighting senator Manny Pacquiao hinungdan nga mi­gawas ang katahap nga posibleng mobiya na siya sa liga.

Sa miaging adlaw, gi­kompirmar sa Pambansang Kamao sa Pilipinas nga wala pa.

Sa interbyu sa programang Beyond Politics sa ANC, gipangutana si Pacquiao sa host nga si Lynda Jumilla kabahin sa iyang posisyon isip pla­ying headcoach sa Mahindra Flood Busters.

Nagkanayon si Pacquiao nga wala niya makita ang iyang kaugalingon nga mobiya sa iyang posisyon sa Mahindra.

“Hindi pa naman,” batbat ni Pacquiao. “Basta ang sinisigurado ko, anuman ang gagawin ko sa labas, hindi maapektuhan yung trabaho ko ditto sa Senate.”

Ang 8-time world champion adunay duha ka mga posisyon sa Mahindra apan taodtaod na sab nga wala kini nasigpatan sa mga duwa sa Flood Busters.

Si assistant coach Chris Gavina maoy naggiya sa Mahindra, nga wala na’y paglaom nga makaabante sa sunod round sa kasamtangang nagpada­yon nga Philippine Cup.

Kasamtangang kining naggunit og 2-7 nga rekord.

“Dinadalaw ko yung team,” pasabot ni Pacquiao.

“Supposedly last Sunday maglalaro ako pero na-delay yung flight.”