COTABATO CITY - Gitakda nga ipailawom sa state of calamity ang tibuok probinsiya sa Maguindanao sa nasinatiang grabeng pagbaha.

Kini mismo ang gikompirma ni Maguindanao 2nd District Board Member (BM) King Jhazzer Mangudadatu.

Matud ni Mangudadatu nga ilang nahisgutan sa Sangguniang Panlalawigan (SP) ang pagdeklara og state of calamity sa probinsiya apan ila pa nga gihulat ang damaged assessment report sa Provincial Disaster Risk Reduction Management Council sa mga munisipyo nga naapektuhan sa baha.

Samtang gikanayon ni Myrna Jo Henry sa Autonomous Region of Muslim Mindanao-Humanitarian Emergency Action Response Team (Armm-Heart) nga nadungagan pa ang mga dapit nga gibahaan sa Maguindanao.

Kini gilangkuban sa munisipyo sa Datu Abdullah Sangki, Datu Salibo, Rajah Buayan, Buluan ug Sultan Sabarongis.

Una nang nagdeklara og state of calamity ang Datu Montawal ug Pagalungan sa probinsiya.

Nagpasalamat sila Datu Montawal Vice Mayor Datu Otho Montawal ug Pagalungan Mayor Datu Salik Mamasabulod kang Armm Governor Mujiv Hataman, Maguindanao 2nd District Congressman Sajid Mangudadatu, Department of Social Welfare and Development (DSWD)-Soccsksargen, mga miyembro SP Maguindanao sa pagpanguna ni Board Member King Jhazzer Mangudadatu, Armm-Heart, Department of Health-Armm, DSWD-Armm, 6th Infantry Division, mga rescue group, local government units employees, Office of Civil Defense-Armm, mga pribadong sektor, Maguindanao People's Medical Team ug kang Governor Toto Mangudadatu nga nagpaabot og tabang sa mga gibahaan.

Mismo sila Hataman ug BM Mangudadatu ang personal nga mitunol sa mga hinabang sa mga pamilya nga naapektuhan sa baha sa Datu Montawal ug Pagalungan.

Gikompirma sab ni Vice Mayor Montawal nga 60 porsyento na sa mga molupyo sa Datu Montawal ang nakabalik sa ilang mga bay sa diha nga miubos na ang lebel sa baha.

Nanawagan sab si Mayor Mamasabulod og dugang hinabang kon diin bag-o lang silang nagdeklara og state of calamity apan dili igo ang pundo aron itabang sa tibuok munisipyo nga gilunupan.