ANG Dabawenyong si Lee Vann Corteza mipuwesto sa ika-tulo sa Big Foot 10-Ball event sa nagapadayong Derby City Classic 2017 aron mobulsa og $4,000 o P200,000 sa Southern Indiana, United States of America.
Una niini bag-ohay lang siya midaug og runner-up sa first series 2017 World Pool Series Molinari Players Championship didto sa Steinway Billiards sa New York City niadtong Enero 18.
Ang Dabawenyo napildi kang Jayson Shaw sa Glasgow, United Kingdom sa ilang semifinals match.
Matud sa asawa ni Corteza nga si Gelia, nawala ang kontensyon sa Bank Pool category apan nagpabilin pa siyang buhi sa one-pocket division human dunay duha ka daug.
Ang 9-Ball category, nga iyang giapilan, wala pa nagsugod.
Si Corteza, ang 2013 China Open ug World Cup of Pool champion, ang ranked number 5 karong tuiga sa AZ Billiards Leaderboard nga dunay kinatibuk-ang $12,500 winnings gikan sa iyang duha ka events.
Si Pinoy Carlo Biado anaa sa ika-10th dunay $6,000 samtang nanguna si Gareth Potts sa Great Britain nga $43,869. (MLSA)