LAING biktima ang nagpatala sa Police Station 1 sa Divisoria human gilabnihan sa riding-in-tandem niadtong Martes sa hapon, Enero 24, sa Tiano Street, dakbayan sa Cagayan de Oro.
Ang nagpatala nailang si Regina Cartagena, 51, minyo, taga Upper Bulua ning dakbayan.
Sa nahipos nga impormasyon gikan sa Police Station 1 sa Divisoria, gikabutyag nga samtang nagbaklay ang biktima sa dalan Tiano paingon sa Velez Street kalit lamang kining gilabyan sa mga nakamotorsiklo ug gilabni ang dala niini nga bag.
Ang duha ka mga suspek kinsa nagsakay sa Rouser nga motorsiklo nga kolor pula ug walay plaka ang mihimo sa maong pagpanglabni ug maayo na lamang gumikan kay wala kini naguyod sa maong pagbira ang biktima.
Pulos nagsul-ob og helmet ang duha ka mga suspek.
Nadala sa mga suspek ang kwarta, mga importanteng butang ug mga papeles ilabi na ang Agreement of Purchase Land parcel sa biktima hinungdan nga wala kini mahimo gawas sa pagpatala.
Sa pagsulat niini nga balita ang maong insidente ang nakatala na sa buhatan sa Police Station 1 ug giduso na sa operatiba sa kapolisan aron sa dinaliang pagsikop sa maong mga suspek kinsa ubay-ubay na ang mga nabiktima.