PASALIG si coach Carlomagno Dagalea nga mohatag ang iyang Corpus Christi Knights og mga surprisa batok sa defending champion Assumption Montessori School (AMS) pag-agbat nila sa finals sa NBTC Cagayan de Oro Leg karong Sabado, Enero 28, didto sa Xavier University Gym.

Dako sab og kompyansa ang Knights tungod kay napildi nila ang AMS Jaguars ni coach James Racines atol sa Cagayan de Oro City Meet finals ning school year.

Tuod wala ang presensya sa twin towers nga sila Rommel Calahat ug Austin Rome Mutya niadtong tungora sa Jaguars, mao ra gihapon ang buhaton sa Knights ug naa lang gamay nga i-adjust.

“The team that could execute their game plan and could effectively adjust as the game progress will most likely win the Championship,” ingon ni Dagalea sa iyang pahayag niadtong Miyerkules mahitungod sa ilang preparasyon kontra sa Jaguars.

Sa match up, naa sila Moises Rey Galua ug Jao Agbong sa Knights nga pwede modepensa nila Calahat ug Mutya.

Aduna na'y preparasyon sa Knights batok sa duha pa ka saligando sa Jaguars nga sila Milo Janao ug three-point specialist nga si Stanley Bedolido, kinsa susi sa kadaogan sa AMS batok sa Southern de Oro Philippines College junior Sharks niadtong semifinals niaging Sabado.

“I have been very particular on the details especially on the Jaguars' cards and I hope we will succeed in our preparations,” ingon ni Dagalea.

Aduna pa'y reserba nga pwersa si Dagalea sama nila sweet-shooting PJ Floirendo, Luc Ashton Artazo, Nelman Halasan ug Jovan Jacutin, kinsa nibira og 26 puntos sa pagsakwat sa Knights sa daug kontra sa Saint Mary's School sa semifinals.

“If we can execute our defense the way we planned it to be, chances are they will be suprised,” butyag ni Dagalea.