GIKLARO ni Police Regional Office-Northern Mindanao Regional Director Agripino Javier nga walay lakip sa minor revamp si Cagayan de Oro City Police Director Ronnie Francis Cariaga.

Gibutyag ni Javier nga dili kinahanglan hulipan nga iyang nakita nga maayo man ang performance sa pipila ka mga city director sa nagkalain-laing dakbayan sa rehiyon ug usa niini si Cariaga.

Gipasabot niini nga ang iyang gihulipan kadto lamang ang iyang mga nakita nga aduna gayud mga kakulangon sa pamunoan.

Gibutyag niini nga ang City Public Safety Company ning dakbayan sa Cagayan de Oro ug laing usa gikan sa Misamis Occidental ang lakip sa iyang gipahulipan ingon man ang Provincial Public Safety Company sa Misamis Oriental.

Gipasabot niini nga iyang gibalhin ang mga hepe niini basin unya og mahimo nila ilang insaktong tahas sa laing dapit.

Matud ni Javier nga aduna siyay mga reklamo nga gakadawat kalabot sa mga opisyal ug polis apan sa iyang pag-imbestigar walay igong basihan.

Apan giangkon niini nga duna sab gayud mga gagmay'ng ranggo nga napotbol sa pwesto tungod sa mga kalapasan.

Giawhag ni Javier nga itaho kanila kung adunay mga polis nga namatikdan nga wala na nihimo sa ilang insaktong tahas.