WA na magkasinabot ang ubang mga alipuris ug batabata ni Presidente Duterte. Una niini ang awhag ni House Speaker Pantaleon Diaz Alvarez kang Philippine National Police (PNP) chief Director General Ronald “Bato” dela Rosa nga mo-resign tungod sa pag-kidnap ug pagpatay kang South Korean national Ick Joo Jee.

Wala ko makatuo nga si Speaker Alvarez makaako pagsaway kang Bato ug pagpakanaug niini sa katungdanan. Abi kadto nako og duna siyay pagtugot sa presidente sa paghimo niadto kay nasayud man siya kon unsa ang pagsalig niini kang Bato. Karon nga nidisisyon na ang presidente nga dako ang iyang pagsalig kang Director General Ronald dela Rosa nahilum si Alvarez. Mitak-um usab ang baba sa ubang mga senador human madungog si President Duterte.

Alang kanako angay hatagan og laing higa­yon ang PNP Chief aron pagtutok sa iyang trabaho. Kon dunay nagpadako sa ulo ni Bato, kadto ra usab kanang mga tawo nga midayeg kaniya. Duna man guy daghang mga fans niya nga miawhag kaniya nga modagan pagka-senador karong umaabut piniliay.

Husto si Senador Panfilo Lacson nga maayong motrabaho si dela Rosa apan dili lang usa niya isud sa ulo kining iyang pagkasikat kay kanang pagka-senador moabot ra sa hustong panahun.

Sa laing bahin, si Senate Majority Leader Vicente “Tito” Sotto ug ubang mga senador nga sakop sa mayoriya buot nga papahawaon na sa coalition ang mga senador nga dili mopaluyo sa mga kalihukan sa Duterte administration.

Daghan kini sila nga mosokwahi kanunay sa baruganan sa majority ug kanunay nga mopaluyo sa ilang mga alalay sa Liberal Party nga wa mo-ipon sa majority coalition. Gipangulohan kini ni Senate President Pro-Tempore Franklin Drilon.

Niadtong Martes, lima ka mga batan-ong senador sila si - JV Ejercito, Sonny Angara, Win Gatchalian, Joel Villanueva ug Migz Zubiri miporma sa gitawag nila og “seatmates.” Usa kini ka bag-ong grupo nga nagpaluyo sa liderato ni Senate President Koko Pimentel kon tay-ugon kini.

Si Senator Richard Gordon misaway usab sa LP nga kanunay nga mopabor sa ilang kapartido sa nagkalainlaing imbestigasyon sa Senado. Iyang gipangu­tana kon nganong nahimong sakop sa mayoriya si Senador Leila de Lima nga klarong kaatbang sa administrasyon.

Tinuod bitaw kinahanglang kon sakop ka sa majority coalition inyong sabutan ug paluhohan ang inyong baruganan kay kon dili mas maayong moklaro na lang sila nga oposisyon.

(msr1144@yahoo.com)