GIBANTOG si Cebu City Mayor Tomas Osmeña nga usa ka maayong manager, maayong tagdumala. Apan kon bahin na gani sa suliran sa basura, mora man og nagkapangka-pangka siya.

Gipaablihan niya ang sirado na nga Inayawan Sanitary Landfill aron adto na sab ilabay ang basura sa syudad. Sa dihang nimando ang Court of Appeals nga sirad-an sa hingpit ang Inayawan landfill, wa siyay kapa-ingnan.

Unsay iyang gihimo? Didto niya ipalabay ang basura sa syudad sa usa ka luna sa South Road Properties (SRP). Temporaryo ra hinuon kadto, kay gitawag ra man nga usa ka transfer station sa basura.

***

Apan mahinungdanon nga makolekta ang mga basura gikan sa kadalanan sa atong syudad, labi pa sa mga urban areas. Di kini mahimong dayan-dayan sa usa ka modernong syudad.

Way malipay nga makakita sa nagtipun-og nga basura sa daplin sa dan. Samot na si Mayor Osmeña. Sa dihang iyang nakita ang nagtipun-og nga basura didto sa Barangay Kamputhaw, unsay iyang gihimo?

Iyang gihulga nga tangtangon ang P5,000 nga allowance nga gihatag sa gobyerno sa syudad ngadto sa mga garbage collector sa maong barangay.

***

Apan angay bang tangtangan ang mga garbage collector sa Barangay Kamputhaw sa ilang allowance? Kon nagtinapulan, angay ug matarong lang gayud.

 

Apan matod pa ni Kamputhaw Barangay Chairman Trifonio Lequigan Jr., ang nagtipun-og nga basura sa Gorordo Avenue, kansang hulagway gi-post sa Facebook, angayan nga kolektahon sa  Department of Public Services (DPS) sa City Hall.

Matod pa niya, maoy ilang gikasabotan nga ang barangay maoy mokolekta sa basura sa mga interior nga mga karsada ug mga sitio, samtang ang DPS mao mokolekta sa basura sa mga dagkong karsada sa syudad.

***

Apan duna bay mahimo ang mga yanong lungsuranon ug mga lomulupyo sa syudad aron di magtipun-og ang basura sa atong kadalanan? Si John Paul Gelasque, operations chief sa DPS, niingon nga dako kaayo ang mahimo sa katawhan.

Matod pa ni Gelasque, kinahanglan nga masayod ang mga tawo nga di mahimong ipagawas ang basura sa di pa moabot ang panahon sa tingkolekta nga gikan sa alas 5 sa hapon ngadto sa alas 7 sa buntag.

Mas labi tingaling maayo nga di gyud tugtan nga ibilin lang ang basura sa daplin sa dan kay magkatag kini kon ukayon sa mga scavenger ug sa mga iro nga libud-suroy.  

Mas maayo gyud nga huwaton nga moabot ang trak sa basura sa ilang dapit una pa ipagawas ang basura.