GIPOSTE ni Rusell Westbrook ang ika-60 nga triple-double sa iyang career sa 114-105 nga kadaugan sa Oklahoma City Thunder batok sa New Orleans Pelicans kagahapon sa National Basketball Association (NBA).
Nailugan ni Westbrook si legendary Larry Bird sa ikalimang luna sa padaghanay og triple-double sa kasaysayan sa NBA.
Si Westbrook nagpakatap og 27 puntos, 12 rebounds ug 10 assists aron pangulohan ang kadaugan ug iposte ang iyang ika-23 nga triple-double ning maong season. Ang Thunder nakamugna og 22 puntos nga labaw sa 2nd half apan nakasugat kini og pagpanghudlat sa hinapos nga bahin.
Hinayhinay nga ninggukod ang Pelicans hangtod nga nakaduol sila pagbalik, 100-105, sa nahabiling 5:33 minutos.
Napukaw ra hinuon sa Thunder ang ilang opensa aron angkunon ang siyam ka mga puntos nga kadaugan. AFP/ESL