PADAYON ang kalbaryo sa host Cleveland Cavaliers ug nasugamak na sab kini sa laing kapildihan, ning higayuna pinaagi sa overtime batok sa Sacramento Kings, 116-112, kagahapon sa National Basketball Association (NBA).
Dili kini maoy gustong resulta ni Cavaliers superstar LeBron James sa iyang pagbagulbol sa publiko kabahin sa kasamtangang nasinati sa defending champions.
Ang four-time MVP nagpakatap na sab og triple-double nga 24 puntos, 13 rebounds ug 11 assists apan ang tanan niyang paningkamot nawad-an ra og bili human naangkon sa Cavaliers ang ikaunom nga pilde sa miagi nilang walo ka mga duwa.
Sa kinatibuk-an, ang Cavaliers ningdakin-as sa 30-14 nga rekord.
Human sa kapildihan sa Cavaliers batok sa New Orleans bisan wala ang labing sinaligan sa Pelicans nga si Anthony Davis ning bag-uhay lang, ‘miulbo ang kaspa’ ang kaspa ni James ug nagbagulbol kini’g insakto.
Nagyayaw si James nga ang trayanggulo nila ni Kyrie Irving ug Kevin Love wala’y saktong suporta nga nadawat gikan sa ilang mga kauban.
Sa wala pa nagsugod ang duwa batok sa Kings, si Cavaliers coach Tyronn Lue mipabuhagay nga naghimo na sila og lakang aron tutokan ang mga reklamo ni James.
“We talked to him and he understands, he understood and now we’re going to move on,” pasabot ni Lue.
Ang general manager sa Cavaliers nga si David Griffin wala nakauyon sa gisulti ni James nga milugak ang team management kabahin sa tinguha sa Cavaliers nga makapedensa sa korona.
Hinuon giklaro ni Griffin nga maayo ang dagan sa ilang panagsulti ni James.
“The comment about the organization being complacent I think is really misguided,” pasabot ni Griffin.
Apan sa kapildihan sa Cavaliers batok sa Kings, gilauman nga wala mibugnaw ang kapungot ni James.
Si Love nitampo og 21 puntos alang sa Cavaliers samtang si Irving nidugang og 20 puntos.
Ang tres ni Aaron Afflalo sa nahabiling 30.8 puntos maoy nakahatag sa Kings og 115-112 nga labaw.
Sa return play, si James nasipyat sa iyang three-point attempt sa nahabiling 10 segundos nga maoy nakapahayag sa kadaugan sa Kings.
Gipangulohan ni DeMarcus Cousins ang Kings pinaagi sa iyang 28 puntos ug 11 rebounds, nihatag og 23 puntos si Darren Collison samtang nidugang og 14 puntos si Afflalo.
Ang Kings mingsaka sa 18-27 nga rekord. ESL/AP