NAPAMATUD-ANG epektibo sa pagpaluag sa dagan sa trapiko sa Mandaue sa pagpatuman sa truck ban sa mga nag-unang kadalanan sa dakbayan.

Tungod niini, nihangyo si Konsehal Malcolm Sanchez sa Traffic Enforcement Agency of Mandaue (TEAM) nga ilakip ang dalan B. Ceniza sa tuyo nga kaluagan ang dagan sa trapiko sa dapit.

Sa kasamtangan, may gamayng merkado nga naa dapit sa dalan B. Ceniza, nga matod ni Sanchez, ubay-ubay na ang mga tindahan, permanenteng istruktura ug stalls sa dapit.

Busa nigamay ang dalan sa dapit imbes sa 4 lane nahimo nalang kini og two-lane.

“As the street is not included in the truck ban, it is quite normal for delivery trucks, particularly those exceeding four wheels, to enter and park along the street at any time they wish to do so,” matod ni Sanchez sa iyang resolusyon.

Sa pagkaaproba sa iyang resolusyon atol sa sesyon sa konseho niadtong Miyerkules, nihangyo si Sanchez nga mosumiter ang TEAM og taho nga may mga saktong rekomendasyon kalabot sa maong tahas sud sa 15 ka adlaw.

Matod ni Sanchez, ang presensya sa mga delivery truck nga giparking sa maong dalan ilabi na panahon sa peak hours, nakahimo sa dan nga one-lane imbes two-way traffic ang dapit.

Ang mga truck nga moagi sa Mandaue kinahanglan nga motuman sa truck ban sa mga dagkong dan sa dakbayan nga mahitabo matag alas 7:00 hangtod sa alas 9:00 sa buntag ug alas 4:00 sa hapon hangtod sa alas 7:00 sa gabii.

Ubos sa ordinansa no. 12-2012-777, ang mga trak nga may gibug-atong 4.5 ka tonilada (4,500 kilos) pataas lakip sa truck ban. Ang maklapas sa ordinasa makamulta og P1,000 sa unang opensa niini.