Honorarium sa mga kawani sa barangay di na langayon

MAAYONG balita alang sa mga kawani sa barangay sa dakbayan sa Sugbo nga naghinamhinam nga madawat ang ilang honorarium gikan sa City Hall, mobalik sa kaniadto nga proseso ang tumong karon sa Association of Barangay Councils (ABC) aron malikayan na ang pagkalangay.

Matod ni Konsehal Margarita Osmeña nga ang maong kalambuan, mas maminusan ang delay sa pag-release sa sweldo nga counterpart alang sa mga barangay tanod ug lupong tagapamayapa sa 80 ka barangay sa Cebu City.

Si Osmeña, kinsa mao ang gitudlo sa iyang bana nga si Mayor Tomas Osmeña isip deputy mayor for finance, niingon nga atol sa meeting nila kagahapon, nahisgutan nila kon unsaon nga mapaspas ug madali ang proseso sa payrolls sa honorarium sa mga kawani sa barangay.

Dugang sa konsehal nga tumong sa ilang meeting aron mahatagan og tubag sa rason sa delay ug unsaon pagsulbad.

Si ABC President Philip Zafra sa iyang bahin nagkanayon nga sugod karong buwana, magkinahanglan na nga ang barangay mosumiter sa ABC office sa inadlaw nga time record ug accomplishements alang sa tanang tanod ug lupon.

Kon masumiter na nila ang maong gikinahanglan, magsugod na og preparar ang ABC alang sa payroll niini ug isumiter kini sa City Administrator Office bag-o ang regular nga proseso.

Kahinumduman, dunay mga kapitan sa barangay ang nangreklamo human wala makadawat ang ilang kawani sa honorarium gikan sa Syudad tungod sa kataas sa proses nga kinahanglan nila nga tumanon.

Sa Brgy. Tisa lang, nilungtad sa unom ka buwan nga wala magdawatan og honorarium ang mga tanod ug lupon niini.

Dihang gipangutana si Osmeña kon makuha pa kini nila, matod sa konsehal nga makuha pa gihapon kini nila kon masumiter na ang mga rekisito.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph