NAKASAWAY ang mga lumolupyo sa lima ka mga sityo sa Barangay Lawaan 2 sa plano sa Talisay City Hall sa plano sa hingpit nga pagguba sa spillway sa sapa sa Mananga nga mao untay ilang kaagian sa paglabang.

Human sa pagbaha sa miaging semana, tipik sa spillway naguba hinungdan nga ang mga lumolupyo moubog na sa tubig.

Nisamot ang ilang kaguol kay ang spillway hingpit nga ipaguba ni Mayor Eduardo Gullas human masuta sa mayor nga nakaingon kini sa pagkahugno sa riprap kilid sa mga balay sa Gawad Kalinga.

Nanawagan sila kang Gullas nga hulipan og laing taytayan nga puthaw ang spillway kon kini hingpit nga gub-on.

Kagahapon sa buntag, nagtapok ang mga lumolupyo ug ningpadangat sa ilang reklamo sa Superbalita Cebu tungod kay nakasugat silag kalisdanan sa pagtabok sa sapa.

Si Gullas nibisita sa maong lugar uban sa taga Department of Public Works and Highways, 2nd Engineering District.

Human niya makita ang sitwasyonb, siya nimando nga ipaguba sa labing dali nga panahon ang spillway nga gipatukod ni Marciano Parba.

Si Gullas wa mahi­muot tungod kay gumikan sa spillway, niawas na hinuon ang tubig sa sapa nga maoy nakaingon sa pagka-guba sa riprap sa mga balay sa Gawad Kalinga.

Si Gullas miingon nga kon siya ang pabut-on, iyang ipaguba nga hingpit ang maong spillway aron diretso ang pagsubay sa tubig.

Si Parba, sa iyang bahin, naguol kay nigasto siya og P500,000 alang sa maong spillway.

Iyang giangkon nga wa kini permit gikan sa Department of Environment and Natural Resources (DENR) ug sa City hall.

Apan matod niya nga personal kini niyang gasto ug ang iya tuyo nga matarong ang pag-agi sa mga tawo ilabi na sa mga bata nga moadto sa tunghaan nga di na moubog pa sa sapa.

Gumikan sa pagkaguba sa spillway, si Parba niingon nga nakahasol kaayo kini sa liboan ka mga pamilya nga nalipay na unta sa maong taytayan.

Mga ginikanan magpas-an na sa ilang mga anak sa pagtabok sa sapa sukad nga naputol ang usa ka bahin sa spillway.

Si Beth Sinco, lumolupyo sa dapit ug adunay duha ka mga anak nga pulos pa gagmay, niingon nga lisod kaayo ang ilang kahimtang tungod kay kon adto usab sila moagi sa pikas bahin sa sapa paingon sa Tabunok, gialihan na kini og barbwire.

Nanawagan sila kang Gullas nga kon hutdon na pagguba sa spillway, hulipan kini sa mayor og tulay nga puthaw aron aduna silay kaagian.