NAG-UNANG problema karon sa dul-an sa 2,560 ka pamilya nga apektado sa baha ang pagkaon human gibanlas sa pagbaha ang ilang kaumahan.

Ang pinaka-ulahing datus sa Provincial Disaster Risk Reduction and Management Office nagbutyag nga miabot sa 2,560 ka pamilya ang apektado sa pagbaha hatud sa tail end of the cold front.

Nag-unang lungsod nga naapektohan mao ang Nabunturan, Compostela, Monkayo, New Bataan, Montevista, Mawab ug Maragusan.

Hinuon, una nang nag-apod-apod og relief goods ang Provincial Social Welfare and Development Office sa Compostela Valley ug mga lokal nga kagamhanan ngadto sa nagkadaiyang mga barangay sa probinsya.

Miabag sab ang Philippine Red Cross-Comval Chapter ug Department of Health alang sa medisina ug medikal nga panginahanglan sa mga apektado sa pagbaha.

Miguwa sa pasiunang taho sa Provincial Agriculturist Office, 2,623 ka mga mag-uuma ang apektado human nadunot ug gibanlas ang ilang pananum nga mais, humay, isda ug mga high value commercial crops.

Gibana-banaang mokabat na sa P40,550,350.10 ang balor sa pananum nga nadanyos.

Mikabat sab sa 14 ka mga tulay ug kalsada ang giguba sa tubig-baha diin pipila niini dili pa magamit sa publiko.

Hilabihang naapektohan sa pagbaha ang mga lungsod sa Unang Distrito sa probinsya. (Rockyben S. Catisay)