Reklamo sa baho nga aso sa coal plant giaksiyonan ni Gov. Bautista

DALING gipatawag ni Governor Claude Bautista ang mga kadagkuan sa San Miguel Corporation coal-fired Power Plant ug mga opisyal sa Barangay Culaman, Davao del Sur aron tukion ang reklamo sa mga molupyo sa lugar, Miyerkules sa hapon.

Nakaabot na sa buhatan sa gobernador ang reklamo sa mga molupyo kalabot sa bahong aso gikan sa maong planta.

Nabalaka ang mga molupyo nga makahatag kini og sakit kanila apil ang polusyon nga hayan mopadung sa dagat.

Sa social media account ni Trinidad Caligner gibutyag niini nga angayang mahatagan og saktong waste disposal ang hugaw gikan sa planta.

"Dapat tagaan na og maayong pagtagad ang mga mulo sa tanang molupyo diha sa Malita mahitungod sa gibuga nga aso sa coal plant. Kabalo kitang tanan nga di maayo ang epekto sa mga panglawas sa mga tawo ug usab ang waste products nga gkan sa planta paingon sa dagat," matud ni Caligner.

Matud ni Pinas Geverola Capuno nga dili nila masabtan ang grabeng baho ug makahimo pa kini paghuot sa ilang dughan.

Hinuon, gibutyag ni Marivic Flore-Hubac nga gilayong gi-aksiyonan sa gobernador ang nadawat nga reklamo.

"Well pinapaayos ni Gov. kasi nag-trial sila. Parang may singaw na mabaho raw ang reklamo ng mga tao. Kaya tawag nya attention ng SMC and nag-admit naman sila na inaayos na nila ang technical problem and promise to closely monitor para di maapektuhan ang community," asoy ni Hubac.

Gisulti ni Hubac nga misaad sab ang SMC nga mohimo og medical mission matag bulan aron masusi ang kahimtang sa panglawas sa mga molupyo.

Gipasalig hinuon sa gobernador nga unahon paglantaw ang kahimtang sa panglawas sa mga katawhan kaysa mga benepisyong makuha sa tag-iya sa maong planta. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph