Paglabay mga narco cops sa ARMM gisupak

COTABATO CITY - Dismayado ug hugtanon nga gisupak ni Autonomous Region in Muslim Mindanao (Armm) Governor Mujiv Hataman ang padayon nga pagpadala og mga pulis nga nalambigit sa illegal drug trade o narco cops sa Mindanao.

Ang pamahayag ni Hataman nahitabo dungan sa nadawat niya nga taho nga dunay upat pa ka pulis gikan sa Visayas ang gilabay na sab sa Armm.

Giklaro ni Hataman nga anaa sila sa tunga-tunga sa pagpalambo sa dakong bahin sa ARMM ug ang kinahanglan nila mga tarong nga pulis ug dili mga narco cops.

Gidugang sa gobernador nga daghan kaayo nga sindikato ug mga kriminal nga pulis sa rehiyon nga padayon nilang gilimpyohan ug dili nila kinahanglan og dugang niini.

Kahinumdoman nga sa paglingkod ni Philippine National Police Chief Director General Ronald dela Rosa, ilawom sa administrasyon ni Pangulong Rodrigo Duterte, daghang mga pulis nga nalambigit sa illegal drug trade gikan sa Luzon ang gilabay sa Armm ug Davao Region nga nagsilbi nga silot kanila.

Gitakda sab nga istoryahon ni Hataman si Dela Rosa nga ihunong na ang pagbalhin sa mga narco cops sa Armm.

Una nang nagpadala og sulat si Hataman ngadto sa liderato sa PNP kabahin sa iyang pagsupak sa lakang ni Dela Rosa.

Nagbahad ang gobernador sa mga pulis sa Armm nga nalambigit sa illegal drug trade nga ipadakop ug pasakaan og tukmang kaso gumikan wala silay luna sa rehiyon. (Edgar E. Fuerzas)

Related Stories

No stories found.
SunStar Publishing Inc.
www.sunstar.com.ph