USA ka puya nga gibana-bana nga nagpangedaron og walo hangtod siyam ka bulan ang napalgan nga wa nay kinabuhi sud sa basurahan sa Nidea Street, Bo. Obrero, Barangay 17-B Poblacion, dakbayan sa Davao.
Ang batang puya napalgan ni Edwin Reyes, 33, minyo, garbage collector sa City Environment and Natural Resources Office, nagpuyo sa Barangay Sto. Niño, ning dakbayan.
Base sa blotter sa Sta. Ana Police Station, alas 8:00 sa gabii niadtong Miyerkules samtang gibuwag ni Reyes ang mga basura uban iyang kauban sa trabaho, nakurat sila dihang giablihan ang Parisian Box sanglit dunay patay nga bata nga giputos og sinina nga daghang dugo.
Ang mga tanod sa Barangay 17-B Poblacion nagsulti nga ang garbage bin nga gibutangan sa kahon gipahiluna kilid sa ilang barangay hall sukad pa niadtong Lunes ug dihang napuno na, gibalhin sa butanganan niini sa Nidea Street sa maong barangay.
Dihang gisusi ang closed circuit television (CCTV) footage sa barangay, way nakitang tawo nga naglabay sa maong kahon.
Gidudahan nga kadtong adlawa lang gilabay ang bata sanglit lab-as pa kaayo ang dugo niini.
Padayon ang imbestigasyon sa kapulisan kung kinsa ang ginikanan sa bata aron masilotan. (AD)