USA ka 23-anyos nga dalaga ang gipatay sa gituohan niyang uyab nga empleyado sa gobyerno sud sa lodging house nga nahimutang sa Palma Gil Street, dakbayan sa Davao.
Ang biktima giilang si Rodelisa, 23, nagpuyo sa Battalion, New Carmen, Tugbok District, ning dakbayan.
Base sa blotter sa San Pedro Police Station, ang front desk sa lodging house nagsulti nga ang biktima uban ang wa mailhing lalaki, nag-check sa Room 112 alas 9:00 sa gabii niadtong Miyerkules.
Pipila ka minuto ang milabay, iyang nadungog nga naglalis ang duha sud sa lawak.
Dugang sa front desk nga ala 1:30 sa kaadlawon, Huwebes, iyang nakita nga nagdali og biya sa lodging house ang lalaki.
Sa ilang pagsusi sa lawak, maoy misugat sa ilang panan-aw ang babaye nga nagkadugo mao nga nangayo sila og police assistance.
Ang Scene of the Crime Operatives nagbutyag nga namatay ang biktima tungod sa samad dinunggaban sa iyang liog.
Sa gihimong imbestigasyon sa kapolisan, naila ang suspek nga si Jose Silvano Almasa, 46, minyo, empleyado sa City Environment and Natural Resources Office ug nagpuyo sa Block 3, Lot 8, Anahaw Village, Barangay Maa.
Ang kapolisan nagtuo nga love triangle ang motibo sa suspek nganong iyang gipatay ang biktima.
Ang biktima gihaya sa Angel Funeral Parlor samtang gipangita ang suspek.