TUNGOD sa kahadlok nga gibati ug apektado sa halapad nga pagbaha sa dakbayan sa Cagayan de Oro niadtong Enero 16, gipaubos ang mga tinun-an sa Camaman-an Elementary School sa stress debriefing nga gipahigayon sa Fatima Church sa maong barangay.

Gibutyag ni Virginia Mendoza, Assistant Principal sa Camaman-an Elementary School nga gikinahanglan kaayo sa mga tinun-an ang stress debriefing tungod sa ilang mga kasinatian.

Mokabat sa 3,000 ka mga tinun-an ang nakasinati sa labihan nga baha diin pipila kanila nanuntong na sa lababo ug mga lingkoranan ug pag-uli pa nila sa ilang tagsa-tagsa ka puloy-anan gilubog sab sa baha ang ilang panimalay.

Gani gihulagway sa pipila ka mga tinun-an nga labihan ang ilang kahadlok nga gibati ug kabalaka ug wala silay nahimo kon dili ang maghilak na lamang tungod sa hitabo.

Hinuon pinaagi sa stress debriefing makita na ang kahayag sa ilang mga nawong ug gapangatawa na niining panahona.

Taliwala nga na-delay na og halos usa ka semana kapin ang ilang klase daw adunay mga make-up classes ang gikatakda.

Karong umaabot Lunes, Enero 30, gipaninguha sa tunghaan nga magbalik na sa normal ang klase labina ning panahona padayon pa ang pag-disinfect ug paglimpyo sa palibot sa tunghaan. (SVB)