AKO si Leah, 21 nga taga Barangay 28 ning siyudad sa Cagayan de Oro, ug gusto nako usab nga isaysay ang naagian ko nga kasakit sa gugma kaniadto aron usab mapanaminan sa mga kabatan-onan ilabi na sa mga estudyante pa. Human sa akong naagihan, nagtoo ako nga wala na koy kalipay apan aduna gayoy gitagana ang Diyos alang lamang kanimo.
Sa dihang anaa pa ako sa 2nd year college ug nagkuha sa kurso nga Education sa usa ka tunghaan ning siyudad niadtong tungura ug nag edad pa lamang ako og 17, nadala ako sa emosyon diin nahimo ko ang dili angayang buhaton sa managhigugma.
Nakaila ko si Rodel tungod sa usa ka common friend diin gihatagan ako niya og numero sa cellphone nga gihatag kanako sa akong amiga.
Niadtong higayona, anaa usab ako sa kapakyasan sa gugma sa dihang gibinuangan ako sa una ko nga nauyab.
Gihimo ko si Rodel nga panakip butas kay lage nasakitan man kaayo ko sa akong unang hinigugma apan wala madugay, dali ra usab ako nga nadevelop kaniya kay lage buotan man kini kaayo kanako.
Si Rodel niadtong higayona maoy pagkanaog gikan sa gisakyang barko kay lage usa man kadto ka seaman.
Unang higayon, nagtoo gayud ako nga walay kabilinggan sa kinabuhi si Rodel apan nasayran ko na lang nga dako diay kining minyo sa dihang upat na ka bulan ang akong gimabdos, hinungdan nga naka ingon gayod ako nga ang Seaman..si manloloko gyud diay.
Aduna na akoy nadunggan kaniadto kaniya apan dili ako motoo tungod lage kay gipanghimakak man kini pag-ayo ni Rodel hangtod nga miabot ang panahon nga giangkon na gyud ni Rodel nga anak niya matud pa ang nakita sa akong mga barkada nga ginahatod sa eskwelahan.
Mura kog nadat-ugan sa kalibotan niadtong higayona apan nagpakalig-on ko. Baga kaayo og nawong si Rodel tungod kay buot niini nga ipalaglag ang akong gisabak ug niadtong higayona lage kay dili pa gayod hingkod ang akong panghuna-huna hinungdan nga misugot ako.
Nagtago-tago na kami nga magkita ni Rodel human ko nasayran nga aduna na diay kini anak ug asawa.
Giingnan ako ni Rodel nga magpalit kini og tambal aron akong imnon para ilaglag ang akong gisabak, hinungdan nga nagpaabot ako apan human niadtong panahona, wala na gayoy Rodel nga nagpakita kanako. Nakadesisyon ako nga ihimugso ko ang akong gisabak, hinungdan nga mitug-an na ako sa akong mga ginikanan sa tanang nahitabo ug sila ang mitabang kanako sa dihang nanganak na ako.
Hapit pa gayod ako mamatay niadtong higayona tungod kay high blood man ako ug gani caesarean ako sa dihang nanganak.
Nagtoo na gayod ako nga wala nay kalipay nga moabot sa akong kinabuhi apan sa dihang nakita ko ang usa ka anghel nga akong gihimugso, grabe ang akong kalipay ug pagpangayo og pasaylo tungod kay nakahuna-huna ko sa pagpatay sa kaugalingon nga anak.
Sa pagkakaron, nakalampos na ako sa akong pagtuon ug gitakda na nga magpakasal karong bulana samtang ang akong anak dugay na nga giparehistro sa pamanhunon ko sa iyang apilyedo gani siya pa ang nagpatiwas nako sa pagpa-eskwela.
Mapasalamaton kaayo ko sa Diyos tungod kay bisan pa man sa akong dakong sayop nga nahimo kaniadto, gihatagan gihapon ko Niya og grasya ilabi na sa lalaki nga andam nga modawat kanako bisan paman sa akong naagian.