NLEX mipilde sa Aces; Bolts milatos sa Tropang Texters

NAPILDI sa NLEX Railroad Warriors ang Alaska Aces, 113-102, sa 2015 PBA Governor's Cup niadtong Lunes sa gabie sa Mall of Asia.

Ang duha ka import sa Railroad Warriors nga sila si Michael Mandaly ug Kwame Alexander nangulo og 28 puntos matag usa ug nagkumbinar og 20 ka rebounds samtang si Asi Taulava midugang og 20 puntos ug 13 ka rebounds.

Labaw ang Railroad Warriors sa rebound diin mikolekta kini og 50 kontra sa Aces nga 30 lang human sa dula.

Mibira si Romeo Travis og 31 puntos alang sa Aces samtang nipatak si Cyrus Baguio og 23 puntos apil na iyang lima ka tres sa pito niya nga tira.

Sikit kaayo ang away sa duha sa unang tulo nga kwarter.

Nakuha sa NLEX ang una nga half diin nasirado ang una nga kwarter sa 31-29 ug ikaduha nga kwarter sa 60-54.

Naangkon sab sa Aces ang labaw paghuman sa ikatulo nga kwarter diin nahuman sa 85-83.

Apan didto sa kataposan nagbangi sa kadaogan diin parehas naghulat sa ensakto nga higayon. Ang panag-uban nila ni Mandaly, Alexander, Taulava ug Macmac Cardona mipaulbo sa labaw nga wala natubag sa Aces.

Mitali na ang NLEX og duha ka daog ug upat ka pildi samtang ang Aces nabugko sa ikatulo nga pwesto uban sa Global Port Batang Pier nga aduna'y upat ka daog ug duha ka pilde matag usa.

Mikuha si Andre Emmet og 36 puntos hilabi na nga wala'y tatsa sa tres nga sulod tanan iyang unom ka tira samtang mipatak si Sean Anthony og 24 puntos ug 13 ka rebounds aron sakwaton ang Meralco Bolts paagi sa 119-85 nga kadaogan batok sa TalkNText Tropang Texters.

Misaka ang Bolts sa usa na sab nga ang-ang nga aduna'y upat ka daog ug tuo ka pildi samtang ang Tropang Texters anaay tulo ka daog ug tulo ka pildi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph