GIBALHOG sa prisuhan ang usa ka lalaki human nakuhaan og ginadili nga druga niadtong Martes sa Purok 2, Barangay Lingating, lungsod sa Baungon, Bukidnon.

Giila ang suspetsado nga si Michael Labita, residente sa susamang dapit.

Tungod sa sunod-sunod nga report sa illegal nga kalihokan sa dapit, milusad og operasyon ang Baungon Police Station uban mismo sa Barangay Kapitan sa dapit nga si Rogelio Dacer.

Malampuson nga nasikop si Labita diin nakuha gikan sa posisyon niini ang duha ka mga sachet sa gitouhang shabu nga mao'y napalit gikan sa suspek uban sa P400 nga marked money.

Apil sa nakumpiska ang 13 ka mga laing cellophane sa ginadili nga druga, mga illegal drug paraphernalia ug cellphone nga maoy gigamit sa transaksyon.

Sa pagkakaron, ang suspetsado gibalhog na sa prisuhan sa Baungon Police Station kinsa gikatakdang mag-atubang og kasong supak sa RA 9165 kon Dangerous Drugs Act. (SVB)