GIDARO sa trak ang usa ka tindahan sa North Poblacion sa siyudad sa Naga. Mao ni headline sa mga balita niadtong Huwebes. Ako nga nag cover sa maong aksidente sa kadalananan nga kining magpuyo ta daplin sa highway di gyud luwas batok sa mga disgraysa. Maayo gani kay ang tindahan ra’y gidaro.
Kung nalahos pa sa balay nga diha ra sab sa likod sa tindahan ambot ug unsay mahitabo ni Winston Villareal kauban ang iyang asawa nga nangatulog pa niadotng higayona. O si Al Sasan nga nag-inusarang natug sa iyang balay tapad sa mga Villareal.
Kini nga trak di ordinaryo kay nag guroy ni ug trailer nga daghan ug ligid. Wa nako maabti ang driver nga si Jessi Cañas. Ang iyang truck boy nga si Narsing Palabrica maoy niasoy nako sa hitabo.
Matod niya padung sila sa Cebu City ug hinay ra silang nagdagan sa highway. Sa dihang naabot sila duol sa eskina may nag-motorsiklo nga kalit lang nilabang mao tong gilubag sa driver padung sa wala ang manobela aron di madasmagan ang nagmotorsiklo. Ang trak nideretso sa tindahan nga gipanag-iya ni Eusifina Sumampong. Gawas sa tindahan nadasmagan sab ang trisikad nga gipanag-iya ni Alix Aliganga.
Ang giasoy ni Narsing nako mao sab ang na-blotter sa traffic section sa Naga City Police Station. Si PO3 Menandro Bolibor, Traffic Investigator, niingon na nagkasinabot na ang operator nga si Aisha Raji ug ang tag-iya sa tindahan ug trisikad labot sa danyos. Ang gusto nila nga di na paaboton ang insurance nga mopagawas og kwarta. Kinahanglan bayran dayon sila sa operator sa kahadlok nga di sila mabayran unyag abot sa panahon.
Mao ni subayonon sa mga imbestigador bisan kung ilang gitanggong ang lisensiya sa driver. Ibutang nato nga may on danage ang insurance sa trak pero ang panginabuhi sa mga biktima unsaon naman lang kung malangay pa ang bayad. Mao bitaw ni akong giingon sa akong higala nga may trak nga negosyo paghakot ug mga utanon sa Carbon Market. Pabawni og cash ang imong driver aron nga may matunol dayon kung makasugat og disgrasya.
Maayo unta kung sa tanang higayon makontak ang operator unya kung tua sa layo ang disgrasya. Kanang cash magamit sab sa driver ug truck boy kung sila maapiki.