KUYAW ang kuwang sa atiman. Daghang kadaot ang mahitabo gumikan sa kayamukat nga paagi, labi na’g managhan ang wa’y buot ug di kabalo unsa’y kinahanglang buhaton.
Lihok gyod aron duna’y igong isagubang sa bisan unsang suliran nga makalisang. Kay kon magluya-luya, pastilan, maglisod gyod og samot. Mao nga maayong hingusgan gyod ang pagtagad sa mga panghitabo nga gapadayag sa kahimtang nga gubot. Pananglitan duna’y irong buang, nan tarong gyod ang pagsusi ug pagsuhid sa palibot aron madakpan ug mapugngan ang iyang nayabag nga kamangtas. Mao’y hinungdan nga gipahigayon ang pag-alima sa kapin 100 ka mga iro nga gituplokan og anti-rabies vaccine sa Barangay Casuntingan diha sa dakbayan sa Mandaue bag-ohay lang. Nasayran nato nga naniguro gyod ang City Veterinary Office (CVO) sa Mandaue sa pagbakuna lakip sa mga iring nga lagmit lakip sa 23 ka mga tawo nga gipahit og irong buang. Gikataho nga gilit-ag sa kagamhanan didto ang mga iro nga saag. Kay kahadlokan tuod ang dangatan kon dili panumbalingon ang mga pinasagdan.
Gakatag lang ang agi kay kuwang sa pagtagad. Ingon ini pod ang makapungot nga gidangatan sa mga sagbot sa dakbayan sa Sugbo. Namantala na pod baya ang damak nga pagdam-ok sa mga basura sa kadalanan, ug kini mao’y hinungdan nganong giaghat sa City Hall ang mga sinaligan sa 80 ka kabaranggayan dinhi. Sumala pa sa tigdumala sa Department of Public Services, naa’y daghang gahi’g ulo nga wala’y pagtagad sa lagda kabahin sa gitakda nga paglabay sa ilang mga hugaw. Mao ra’g wa’y kalainan sa mga irong nalisoan sa panimuot, patuyang na lang pakatap sa ilang kagaw. Kining suliran sa gatipun-og ug gapasad nga mga basura hagbay rang hinungdan sa pinaghotay sa kagamhanan diha sa City Hall ug mga tig-atiman sa kabaranggayan. Imbis magtambayayong aron mogaan ang naandang suliran mahitungod sa mga sinalibay, kini nahimo na hinuong hinungdan sa “tension between the City Government and the barangays,” segun pa sa atong nabasahan. Pwera buyag, lupig pa’y uwang alang sa buwan kining kabanha sa ilang kagubot kon padayong kutob ra sila sa paghot ug dili nila mabadlong ang mga wa’y buot, wa’y hunong sa ilang hinanggaw nga paghipos sa ilang hugaw.
Mahinlo ra unya ang katilingbanong gumunhap-- kining gadasok nga mga kabalaka ug kaguliyang sa hunahuna. Unya ra kon duna’y kusganong tumong ug hiniusang lihok tali sa mga nangalagad ug mga gialagaran batok sa kadanghag aron wala na’y makitang katag. (geemyko@gmail.com)