GIHAGIT sa abogadong si Edgardo Uy, chairman sa Task Force Hapsay Dalan sa Dakbayan sa Cagayan de Oro, ang tanan nga mga street vendor nga giingong naabuso sa mga traffic enforcers sa area sa Cogon ning dakbayan.

Gibutyag ni Uy nga kung kinsa man ang mga mamaligyaay nga naabuso ug nasakitan, nga pormal nga moreklamo aron aduna'y basihan nga kini ma-imbestigahan.

Wala gikalipay ni Uy ang nanggawas nga report nga adunay mga street vendor nga gi-ingong gipasakitan sa mga traffic enforcer hilabi na sa pagpapahawa sa kadalanan tungod kay gipatuman ang balaod trapiko sa dapit.

Gipasabot ni Uy nga gidili sa dalan ang pagpamaligya apan daw mubalik gayud ang mga mamaligyaay sa dapit.

Gani niadtong July 1, tuig 2013, boluntaryo nga gipangguba sa mga vendor ang ilang stall tungod kay ila kining gipangstorya nga gidili na ang pagpapamaligya sa kadalanan apan gasige gihapon og balik.

Gihatagan na usab og opsyon ang mga mamaligyaay nga tagaan og mga stall sa second floor sa merkado sa Cogon apan gabalilibad tungod kay layo ug dili na mahalinan.

Tungod niini, mihangyo si Uy sa mga mamaligyaay nga unta magsubay sa balaod aron dili makahasol sa uban tawo.

“Kung gusto mo manginabuhi nga dili makahasol sa uban. Ang RTA nanginabuhi usab sila ug kung dili mohimo sa ilang trabaho basin sila maoy mawad-an og trabaho. Unta magsinabtanay lang ta,” matud ni Uy.