MITAOP sa liog sa biktima ang sundang human giluba sa iyang pag-umangkon niadtong Martes alas 11:00 sa gabii sa Barangay Baybay, Lonao, Gingoog City, Misamis Oriental.

Kritikal ang kahimtang ni Florante Labadan, lumulupyo sa susama nga dapit, samtang ang suspetsado giilang si Regie Melgaso, pag-umangkon ra usab sa biktima.

Subay sa taho sa magulang sa biktima nga si Renero Labadan nga duna nay daan nga bikil ang duha tungod sa pag-abot sa ilang isig ka atop sa balay.

Giingong sayo nga misulong ug naglasong ang biktima sa panimalay ni Megalso, hinungdan nga migawas kini ug kalit nga gimartilyo ang ulo niini.

Sa dihang naglayog na ang duha, nakakuha og sundang ang suspetsado og dayon gidunggab ang liog nga bahin ni Labadan.

Anaa sa kritikal nga kahimtang ang biktima sa dihang dali nga gidala sa Northern Mindanao Medical Center.