HIGH value target nga nisukol sa kapulisan patay samtang laing siyam ang nadakpan sa lima ka managlahing mga buy-bust operation sa lima ka mga barangay sa dakbayan sa Lapu-Lapu sud lang sa walo ka oras niadtong Huwebes sa hapon hangtod sa gabii.
Sobra sa P500,000 ang kantidad sa mga gituohang shabu nga nasakmit sa mga kapulisan nga mihimo ug buy bust sugod mga alas 3 sa hapon hangtod pasado alas 11 sa gabie sa dakbayan.
Sa dakbayan sa Sugbo, 11 ka mga tawo ang nasikop nga giingong naghupot og drugs samtang upat ang nasikop sa kapulisan sa mga lungsod sa Sugbo niadtong Huwebes sa hapon hangtod kagahapon sa kaadlawon.
Nisukol
Ang giilang high-value target nga suspek nga si Clifford Degolacion, 31, minyo, taga Sunrise Village, Purok Caimito, Brgy. Gun-ob, sa dakbayan napatay human giingong nisukol sa kapulisan atol sa operasyon niini pasado alas 6 sa gabie sa maong dapit.
Sumala pa sa taga Gun-ob Police Station nga nakadawat ang ilang buhatan og taho nga ang suspek may iligal nga aktibidad sa maong dapit ug sa ilang pakisusi kini nagpositibo.
Lakip sa nasikop sa kapulisan mao ang inahan sa napatayng suspek nga si Alixis, 50 anyos, asa niini nga si Joelly Jane, 27 anyos, ug alalay niini nga si Argie Lacion alyas Tata, 32 anyos, taga Cordova, Cebu.
Atol sa operasyon, si Degolacion gipalitan og usa ka medium sized nga shabu bugti sa P2,000 sa poseur buyer.
Nisuway kini ug dagan sa likod sa ilang balay apan kini namusil sa dihang gisundan sa operatiba hinungdan nga nibawos og pusil ang mga pulis.
Moabot og 36 ka gagmayng pakete, walo ka medium sa gituohang shabu ang nakuha sa kapulisan gikan sa mga dinakpan nga gibanabana nga mokabat og P354,000.
Lakip sa nakuha mao ang P5,480 cash nga gituohang kinitaan, timbangan ug uban pang mga drug paraphernalia.
Nasikop usab sa kapulisan ang laing pito ka gikatahapang mga drug pusher sa Brgy. Calawisan, Pusok, Basak ug Bankal.
Cebu City
Nasikop usab sa mga police station sa Cebu City Police Office ang 11 ka gikatahapang mga anti drug operation sugod niadtong Huwebes sa hapon hangtod kagahapon sa buntag.
Usa sa mga nasikop sa Carbon police station giilang si Ralph Quijano, taga Perelos, dakbayan sa Carcar nga gidudahang tigbaligya og shabu ngadto sa pipila ka mga driver sa Cebu South Bus Terminal.
Laing nasikop giilang sila si Rizalde Castañares, 47; Richie Caluna, 23, pulos taga Brgy. Bulacao; Edgardo Quintos, 46; Dionesio Emiliano, 42; Roel Monteroyo, 49; George Bajao, 43; Rolando Perez, 23; Sheila Marie Jacalan, 23; Chirlan Ragasajo, 32; ug Celsa Buneil, 57.
Lalawigan
Nadakpan usab ang upat ka gikatahapang mga drug pusher sa managlahing mga operasyon sa kapulisan.
Nasikop sa kapulisan sa Barili giilang si Gernel Matidios Basira, 20, taga sityo Kamagayan, Brgy. Malolos.
Sa lungsod sa Liloan, nadakpan sa kapulisan ang duha ka gikatahapang mga pusher nga sila si Ramil Gonzales Cabahug, 41, ug Glenn Pilapil Cabahug, 35, pulos taga Brgy. Yati. Maebelle Rellon-USJ-R Journalism Intern/Niño B. Baldevino, USJ-R B.A. Communication Intern