BISAN pa man og nabaniog na nga ang Australianong si Jeff Horn ang iyang sunod makontra, apan giklaro ni Filipino boxing icon ug world champion Manny Pacquiao nga abli gihapon siya sa mga sugyot kon kinsa ang angay niyang sunod ikontra pinaagi sa social media.
Sa tanang reply nga nadawat ni Pacquiao sa iyang post, wa gyud motumaw bisan og usa lang ang ngalan ni Horn, butang nga posibling makapausab sa hunahuna ni Bob Arum sa Top Rank.
Gituohan nga ang koneksyon tali sa Top Rank nga maoy promoter ni Pacquiao ug sa Duco Events nga maoy handler ni Horn maoy naghatag og oportunidad sa Australian fighter nga makaaway ni Pacquiao.
Si Horn aduna pa lay 16 ka away, walay pildi ug usa ang tabla apan wala pa kini igong kasinatian batok sa mga inila ug dekalidad nga mga kontra, samtang si Pacquiao adunay nay 54 ka away, unom ka pildi ug 35 ang gipang knockout.
Ang pagpakig-away ni Pacquiao sa undefeated nga si Terence Crawford o Vasyl Lomachenko maoy hugot karon nga giindorso sa mga boxing fans.
Ang ikalimang pagpakigkombati ni Juan Manuel Marquez maoy laing butang nga naghatag og interest sa kadaguan ug gihugonhugonan nga kini mapahigayon sa uwahing bahin ning tuiga.
Mao usab kini ang gihandom ni Pacquiao kinsa nagtinguha nga makabawos sa iyang makapakaging nga kapildihan sa dihang gi-knockout siya ni Marquez sulod sa ikaunom ka round niadtong 2012.