ILIGAN CITY -- Gikalipay ni Corneli Agabon ang plano ni Presidente Rodrigo Duterte nga hatagan og Medal of Valor ang tanang mga sakop sa Philippine National Police Special Action Force (PNP SAF) nga namatay sa enkwentro batok Bangsamoro Islamic Freedom Fighters (Biff) niadtong Enero 25, 2015.
Kahinumduman nga duha lang sa 44 ka mga namatay ang gihatagan sa nasangpit nga pasidungog tungod kay matud pa ni kanhi Presidente Noynoy Aquino, mao lamang ang gi-rekomenda sa PNP.
“Nalipay mi kay after two years, nadungog ang among gihandum nga mahatagan og Medal of Valor ang tanan kay sila man tanan ang apil sa operation,” matud pa ni Corneli, asawa ni Police Officer 2 Chum Agabon.
Naglaum usab siya nga matuman ang gisaad nga ideklara'ng Day of Remembrance ang Enero 25 matag tuig aron paghandum sa SAF 44.
Gipangayo lang ni Corneli nga mahatag na ngadto kaniya ang tanang benepisyo nga gisaad nga ihatag sama sa iyang pagpanarbaho ug ang usa ka air pressure o breathing device alang sa iyang sais anyos nga anak kinsa adunay diperensiya sa panglawas o health.
“Kinahanglan kaayo ang CPAP (continuous positive airway pressure) aron dili na siya mapurwesyo inig matulog siya, bahala'g ipaulahi lang ang ilang gisaad nga hearing aid alang sa bata,” dugang ni Corneli.
Sa pagkakaron, naghulat pa siya nga tawagan aron ma-rehire human matapos ang iyang kontrata sa Department of Health niadtong Disyembre 2016.
Si Corneli usa ka overseas Filipino worker isip nurse nga mi-uli sa Pilipinas human mabalitaan ang nahitabo sa iyang bana.
Leksyon
Samtang nalipay ang igsoon sa usa ka SAF nga namatay nga pabuksan og balik ni Duterte ang kaso.
“Kinahanglan nga adunay manubag tungod kay kung dili nila ni panagutan, posible ning mahimong precedents sa mga mosunod nga heneral dili sundon ang chain of command. Kinahanglan nga mahimo kining lesson,” matud pa ni Ruby, magulang ni Police Officer 3 Romeo Senin II.
Miingon si Ruby nga angayang mahimong leksiyon, dili lamang sa PNP, apan lakip na sa Armed Forces of the Philippines (AFP), nga dili angayang basta-basta lang gubaon ang “chain of command” tungod kay “mahal ang consequences” niini.
Si Police Officer 3 Senin unom pa ka bulan nga naminyo sa iyang maestra nga asawa.
Aduna kini upat ka tuig nga anak lalaki sa unang relasyon.
Ang igsoon ni Senin nga usa ka pulis, maoy mitambong dihang gipatawag ang pamilya sa SAF 44 sa Malakanyang aron maatubang si Presidente Duterte. Kauban niya ang anak sa namatay ug ang inahan niini.