MAPASALAMATON si Task Force Hapsay Dalan chairman Edgardo Uy, kinsa usa ka overseer sa Roads and Traffic Administration (RTA), sa pagpangsikop sa mga traffic enforcer nga nalambigit sa pagpayuhot sa ginadili nga droga.
Kini ang gibutyag ni Uy human nga usa ka traffic enforcer ang nadakpan sa drug bust nga gihimo sa Philippine Drug Enforcement Agency niaging adlaw.
“Malipay gyod kaayo ko nga mangdakop pa sila kay aron malimypyohan ni atong mga enforcers diri,” butyag ni Uy.
Daw wala niya gikahimout ang pagkalambigit sa pipila ka mga enforcers niining illegal nga kalihokan tungod kay unta sila maoy ehemplo ug modelo.
Giila ang dinakpan nga si Saab Abyus, sakop sa RTA nga nadestino sa dalan Corrales-Luna Street ug kauban niining mabdos nga si Jamina Kasser, pulos mga residente sa Balulang ning dakbayan.
Gidugang usab ni Uy nga plano sa buhatan nga ipaubos og drug testing tanan sakop sa RTA apan aduna gayud pagkalangan niini gumikan kay walay igong budget alang sa drug testing.
Daw bout niyang malimpyo ang hanay sa mga enforcers nga gaatiman sa pagpahapsay sa dagan sa trapiko diha sa kadalanan. (SVB)