SA SENATE hearing kagahapon, naladlad ang mga detalye sa tokhang-for-ransom ni Jee Ick-joo, negusyanteng taga South Korea, kinsa gidagit ug gipatay niadtong Oktubre sa mga pulis.
Gipatay si Ick-joo sa usa ka pulis sulod sa Camp Crame ug gipangayoan ang iyang asawa og P5 milyones nga ransom human ini.
Gipagawas kini nga anti-drug operation, matud pa sa usa ka pulis nga nakakuyog kay kuno, gipatuo siyang durugistang langyaw ang ilang target.
Laing tulo ka South Korean nga golfer ang gikilkilan usab sa laing mga pulis niadtong Disyembre sa lahi nga grupo sa mga pulis.
Nanglayas ang mga Koreano tungod sa kahadlok ug di na mamalik dinhi sa nasud.
Duna pay giingong laing 11 ka mga kaso sa samang modus sa hiwi nga mga pulis nga ninggamit sa Oplan Tokhang sa pagpangilkil sa ilang mga biktima.
Mao ni ang resulta kon ang mga pulis hatagan og lapad ug dakong gahum batok sa illegal drugs tungod kay duna gyuy mangabuso.
Bisan kon ang tumong niini mao ang pagpuhag sa illegal drugs, ang gahum nga gihatag ni Presidente Rodrigo Duterte sa kapolisan sayon rang maabusohan.
Kining tokhang-for-ransom, usa lang sa hiwi nga mga buhat sa abusadong mga pulis nga magpahimulos sa higayon.
Mahigmata na kaha ang presidente nga tungod sa iyang gihatag nga pagsalig sa kapolisan, kini pahimuslan sa mga badlungon nga unipormado?
Kon iya pa kining duphan sama sa nahitabo sa kaso ni anhing mayor Rolando Espinosa nga gipatay sud sa bilanggoan, mosamot paggara kining maong mga pulis.