MIKALAS og lima ka kinabuhi samtang laing 10 ang samaron sa dihang gilusad ang Law Enforcement operation sa mga awtoridad nga milungtad og kapin 11 oras sa probinsya sa Maguindanao.

Sumala pa nga nagsugod ang operasyon gikan alas 4:20 sa kaadlawon niadtong Huwebes nga nahuman og alas 3 sa hapon sa maong adlaw.

Matud ni Maguindanao Provincial Police Office director, Senior Superintendent Agustin Tello nga mohimo unta og search warrant operation ang hiniusang puwersa sa Criminal Investigation and Detection Group sa Autonomous Region in Muslim Mindanao (Armm), uban ang mga sakop sa 57th IB ug 18th Infantry Battalion, Philippine Army batok sa grupo ni Mayor Rasul Sangki sa Barangay Saniag, Ampatuan sa maong probinsiya.

Apan ilang na-engkuwentro ang mga miyembro sa Bangsamoro Islamic Freedom Fighters (Biff) nga gipangulohan ni Kumander Kagi Karialan sa Barangay Upper Salman, duol sa massacre site kon diin nangamatay ang daghang sakop sa media niadtong 2009.

Milungtad og halos usa ka adlaw ang sinukliay og mga bala tali sa mga awtoridad ug mga Biff.

Tungod sa kadaghan sa mga rebelde, miabag ang duha ka MG-520 attack Helicopters aron moabag sa pagpambomba, dungan sa paghiabot sa dugang puwersa sa kasundalohan dala ang kanyon ug Semba Armored carrier hinungdan nga miatras ang mga kaaway.

Lima ang kompirmadong patay sa Biff samtang tulo ang naangol nga giingon nga apil sa nagprotekta kang Mayor Sangki.

Samtang pito sab ang naangol sa mga sundalo nga gidala dayon ngadto sa Camp Siongco Hospital sa 6th ID Headquarters nga naila nga sila Sergeant Remulta, Corporal Raffy Matingkal, Privates Eldie Mallorca, Erwin Mistoso, Alden Cahoy, Harold John Dionisio, ug Jerusel Castañeda.

Samtang gikompirma ni Myrna Jo Henry sa Armm-Humanitarian Emergency Action Response Team (Heart) nga moabot sa 295 ka pamilya ang mihikling gikan sa mga barangay sa Saniag ug Salman sa Ampatuan.

Nag-apud-apod na og hinabang ang Armm-Heart ngadto sa mga pamilya nga naapektuhan sa kagubot.

Sa pagsulat ning balita, nagpadayon ang paglutos sa mga awtoridad batok sa grupo ni Mayor Sangki sa mga hilit nga dapit sa Ampatuan. (EF)